தொடர்பாடல் - COMMUNICATION

பொதுவாக தொடர்பாடலின் வகைகளைப் பின்வருமாறு வகைப்படுத்தலாம். அவை,

முறையான தொடர்பாடல் என்பது முகாமையாளரினால் அமைக்கப்பட்ட அமைப்பு வரைபடத்தின் அடிப்படையில் மேற்கொள்ளப்படும் தொடர்பாடல் முறையாகும். இது மூன்று வகைப்படும். அவை,

நிலைக்குத்தான தொடர்பாடல் 

இத்தொடர்பாடல் முறையானது இருவகைப்படும். நிலைக்குத்தான கீழ் நோக்கிய தொடர்பாடல், நிலைக்குத்தான மேல் நோக்கிய தொடர்பாடல் என்பன அவையாகும். மேல் மட்ட ஊழியர்களிடமிருந்து கட்டளைகள். கொள்கைகள், தீர்மானங்கள் போன்றன ஊழியர்களுக்கு நிறுவனப் படிமுறைகளிற்கு ஏற்ப அனுப்பப்படுவது நிலைக்குத்தான கீழ் நோக்கிய தொடர்பாடல் ஆகும். கீழ் மட்ட ஊழியர்களிடமிருந்து கருத்துக்கள், முன்மொழிவுகள் போன்ற மேல்மட்ட ஊழியர்களிற்கு அனுப்பப்படுவது நிலைக்குத்தான மேல் நோக்கிய தொடர்பாடல் ஆகும்.

நிறுவனங்களில் உள்ள ஒரே வகையான ஊழியர்களிற்கிடையே மேற்கொள்ளப்படும் தொடர்பாடல் கிடையான தொடர்பாடல் ஆகும்.

நிறுவனங்களில் பல்வேறுபட்ட நிலையில் உள்ளவர்களிற்கிடையிலும் பல்வேறு நிறுவனங்களிற்கு இடையிலும் மேற்கொள்ளப்படும் தொடர்பாடல் பக்கவாட்டான தொடர்பாடல் ஆகும்.

நிறுவனங்களில் சுற்றறிக்கை, அறிவித்தல் பலகை, கடிதங்கள், உள்ளக நினைவூட்டல் குறிப்புக்கள். அக இணையம், தொலைபேசி, தொலைநகல், கூட்டங்கள் போன்றன உள்ளகரீதியான தொடர்பாடல் ஊடகங்கள் ஆகும். தொலைபேசி, மின்னஞ்சல், கடிதம், தொலைத்தந்தி என்பன வெளியகத் தொடர்பாடல் ஊடகங்கள் ஆகும். முறையற்ற தொடர்பாடல் என்பது நிறுவனங்களில் பதவிரீதியற்ற முறையில் பரிமாற்றப்படும் தொடர்பாடல் முறைகள் ஆகும். இத்தொடர்பாடல் தேநீர் இடைவேளை, மதிய இடைவேளையின் போது ஏற்படலாம். தமது பணிகளுக்கிடையே கிடைக்கப்பெறும் ஓய்வு நேங்களிலும் பொதுவான ஒன்று கூடல் நிகழ்வுகளிலும் இத்தகைய தொடர்பாடல் முறை மேற்கொள்ளப்படுகின்றது. இது நிறுவனங்களின் ஊழியர்களுக்கிடையே உறவுமுறைகளை மேம்படுத்த உதவுகின்றது.

வாய்மொழிசார்ந்த தொடர்பாடல் என்பது ஒருவருக்கொருவர் நேரடியாகத் தமது கருத்துக்களை வாய் மூலம் பரிமாற்றம் செய்வதைக் குறிக்கின்றது. வாய்மொழிசார்ந்த தொடர்பாடல் வடிவங்களிற்கு தொலைபேசி உரையாடல், கூட்டங்கள், பேச்சுக்கள், உரைகள், நேர்காணல்கள் / பேட்டிகள், கலந்துரையாடல்கள் ஆகியவற்றை உதாரணங்களாகக் கூறலாம்.

இத்தொடர்பாடலில் எழுத்து மூலமான தொடர்பாடலிலும் பார்க்க வேகம் கூடுதலாகக் காணப்படுவதுடன், பின்னூட்டல் முறைக்குச் சிறந்த வாய்ப்பும் காணப்படுகின்றது. இதன்மூலம் உரிய நேரத்தில் தவறுகளைத் திருத்த நடவடிக்கைகளை மேற்கொள்ளலாம். உடனுக்குடன் சந்தேகங்களைத் தெளிவுபடுத்திக் கொள்வதற்கான வாய்ப்புகளும் உள்ளன. அத்துடன் வாய்மொழிரீதியான தொடர்பாடலில் தகவல்களை வலியுறுத்திக் கூறுவதற்கான வாய்ப்பும் மீள மீளக் கூறுவதற்கான வாய்ப்பும் உள்ளது. எழுத்தறிவற்ற மக்களுடன் வாய்மொழிசார்ந்த தொடர்பாடலை மேற்கொள்ள முடிகின்றது.

இத்தொடர்பாடலில் எதிர்காலத் தேவையின் பொருட்டுத் தகவல்களை நிரந்தர ஆவணமாகப் பேணமுடியாது. அத்துடன் வாய்மொழிசார்ந்த தொடர்பாடலில் மறதி காரணமாகத் தகவல்களை முழுமையாக நினைவில் வைத்திருக்க முடியாது. கூறிய தகவல்களை மறப்பதற்கும் மறுதலிப்பதற்கும் திரிபுபடுத்துவதற்குமான சந்தர்ப்பங்களும் இத்தொடர்பாடலில் உள்ளன. சிலநேரங்களில் நீண்ட கலந்துரையாடல்கள், கருத்துப் பரிமாற்றங்கள் என்பவற்றினால் நேரவிரயம் ஏற்படுவதற்கும் வாய்ப்பு உள்ளது. குரல் வேகம், குரல்தொனியின் தன்மைக்கேற்ப கருத்துக்களும் வேறுபடுவதற்கு இடம் உள்ளதுடன், தெளிவான உச்சரிப்பு, விரைவான பேச்சு, பிரதேச மற்றும் சமூக வழக்குகளை உள்ளடக்கிப் பேசுவதன் ஊடாக ஏனையோருக்குப் புரிந்து கொள்வதில் சிரமங்கள் ஏற்படவும் வாய்ப்பு உள்ளது.

நேர்காணல் என்பது ஒரு வகையான தொடர்பாடல் முறையாகும். செய்தியாளர்களின் பணிகளில் பேட்டி காணுதல் அல்லது நேர்காணுதல் என்பது மிகவும் முக்கியமானதொரு செயற்பாடு ஆகும். நேர்காணல் என்பது ஒருவரோடு அல்லது பலரோடு நேரிலோ அல்லது தொலைபேசி மூலமோ கடிதம் மூலமோ தொடர்பு கொண்டு விபரங்களைக் கேட்டு அறிவது ஆகும்.

நேர்காணல் காணுதல் மூலம் தான் பல நடைமுறைச் செய்திகளையும் சம்பவங்களையும் அறிந்து கொள்ள முடிகின்றது. 'நேர்காணல் இல்லையேல் செய்திகள் இல்லை' என்பது ஊடகவியலின் வாசகமாகவும் உள்ளது. பேட்டி காணுதல் மூலம் ஒரு நெகிழ்ச்சியான முறையில் நடப்புச் செய்திகள் பலவற்றினை அறிந்து கொள்ள முடிகின்றன.

ஒவ்வொரு பேட்டியும் ஏதோவொரு நோக்கத்துடன் நடத்தப்படுகின்றது. தகவல்களைப் பெறுவதற்காகவும், நடப்பினை அறிந்து கொள்வதற்காகவும், நிகழ்ச்சி மற்றும் திட்டங்கள் பற்றிய செயதிகளை அறிந்து கொள்வதற்காகவும், கண்ணோட்டங்களை வெளிப்படுத்துவதற்காகவும் பேட்டியானது நடத்தப்படுகின்றது.

ஊடகங்களில் வானொலி மற்றும் தொலைக்காட்சி ஆகிவற்றில் பேட்டி காணுதல் என்பது தனிப்பட்டதொரு நிகழ்ச்சியாக இன்று இருந்து வருகின்றது. பேட்டியானது தகவல்களையும் விபரங்களையும் பெறும் நோக்குடன் நடத்தப்படுகின்றது. சில பேட்டிகள் திடீரென கருத்துக்களைப் பெறும் நோக்குடன் நடத்தப்படுவதும் உண்டு. சிலநேரங்களில் பேட்டியானது பேட்டிக்காகவும் நடத்தப்படுகின்றது. பிரமுகர்கள், நிபுணர்கள், சாதனையாளர்கள் ஆகியோருடன் மேற்கொள்ளப்படும் பேட்டி முறைகளை இதற்கு உதாரணங்களாகக் குறிப்பிடலாம்.

பேட்டியானது திட்டமிடப்பட்ட பேட்டியாகவும் திட்டமிடப்படாத பேட்டியாகவும் நடத்தப்படுகின்றது. திட்டமிடப்படாத பேட்டி முறையில் ஓர் ஒழுங்கமைப்பினைக் காண முடியாது. ஆயினும் அது கருத்துக்களை மட்டும் அறிந்து கொள்ளும் நோக்குடன் இப்பேட்டியானது நடத்தப்படுகின்றது.

பேட்டி முறையில் பேட்டி காண்பவர், பேட்டி வழங்குபவர் என்று இரு நபர்கள் முக்கியத்துவம் பெறுகின்றனர். ஒரு வெற்றிகரமான பேட்டி ஒன்றினை நடத்துவதற்கு முதலில் பேட்டி காணவேண்டியவரோடு முன்கூட்டியே தொடர்பு கொண்டு ஒப்புதல் பெற்று இடம் நேரம் காலம் ஆகியவற்றைப் பெற்றுக் கொள்ளுதல் வேண்டும். அடுத்து பேட்டிக்கான திட்டத்தினைத் தீர்மானித்து ஒழுங்கமைக்க வேண்டும். பேட்டி காண்பவரிடம் கேட்கப்படும் வினாக்களைத் தயார் செய்வதுடன், அவரிடம் பெற்றுக் கொள்ளவேண்டிய தகவல்களையும் வரையறை செய்து கொள்ளவும் வேண்டும். கேட்கப்படும் வினாக்களையும் ஓர் ஒழுங்குமுறையில் தயாரித்து வைத்திருத்தல் அவசியமாகும். வினாக்களும் பேட்டி காண்பவரின் மனதினைப் பாதிக்க வண்ணமும் அவரை வற்புறுத்தாத வண்ணமும் அமைதல் வேண்டும். பேட்டியில் கேட்கப்படுகின்ற வினாக்கள் தகவல்களைப் பெறுவதற்காகவே கேட்கப்படுகின்றன. இவ்வினாக்கள் குறுக்கு விசாரணைகளாகவும் குழப்பத்ததையும் அச்சத்தையும் ஏற்படுத்துவதாக அமைதல் கூடாது.

அடுத்து பேட்டி எடுப்பவரின் பின்னணியைப் பற்றி பேட்டி காண்பவர் தெளிவாக அறிந்து வைத்திருத்தல் அவசியமாகும். அவருடைய துஐற, பணிகள் குறித்து முன்னேற்பாடான அறிவு பேட்டி காணபவுரக்கு இருத்தல் அவசியமாகும். பேட்டி எடுப்பவர் நெகிழ்ச்சியான முறையில் இருந்தால்தான் பேட்டி வழங்குபவரும் அவர்மீது நம்பிக்கை கொண்டு முழுமையானதும் உண்மையானதுமான தகவல்களைத் தரமுற்படுவார். பேட்டியில் தகவல்களைப் பதிவு செய்து கொள்ள விரும்பினால் முன்னரே பேட்டி காண்பவரிடம் அதற்கான அனுமதியினைப் பெற்றுக் கொள்ள வேண்டும். அத்துடன் பேட்டி காண்பவர் சிறந்த முறையில் செவிசாய்பவராகவும் புரிந்து கொள்பவராகவும் இருத்தல் வேண்டும். பேட்டி வழங்குபவர் தகவல்களை வழங்கக்கூடிய மனநிலையில் இருக்க வேண்டும் என்பதுடன் சிறந்த முறையில் தொடர்பாடல் திறனையும் கொண்டிருத்தல் வேண்டும். பேட்டியில் கேட்கப்படும் வினாக்களைப் புரிந்து கொண்டு அதற்கு ஏற்றவாறு தெளிவாகவும் சுருக்கமாகவும் பதில்களைக் கூறுதல் வேண்டும்.

பேட்டியில் குறுக்கீடுகள். தற்பெருமை. இறுமாப்பு, விவாதம், வெட்டிப்பேச்சு என்பன இருத்தல் கூடாது. கருத்துக்களை அலட்சியப்படுத்தக் கூடாது. இந்தவகையில் ஊடகத்துறையில் தற்போது செய்திகளைப் பெறும் தொடர்பு சாதனமாகவும் தொடர்பாடல் முறையாகவும் பேட்டி முறை அமைந்துள்ளது.

தகவல், விபரங்களை பெறும் நோக்குடனான நேர்காணல்: தகவல்களை சேகரிப்பதே இங்கு முக்கிய நோக்கம். நடந்த அல்லது நடக்கவிருக்கும் ஒரு விடயம் தொடர்பாக இத்தகைய போட்டிகள் நடாத்தப்படும்.

கருத்துக்களை பெறும் நோக்குடனான நேர்காணல் நடந்த ஒரு சம்பவம் அல்லது நடக்க போகும் ஒரு அம்பவம் ஏற்பட போகும் தாக்கம் போன்ற நிலைகளில் கருத்துக்களை பெறும் நோக்குடன் இப் பேட்டிகள் நடத்தப்படும். இவை திட்டமிட்ட ஒழுங்கமைக்கப்பட்ட பேட்டிகளாக அமைவதில்லை. இவை திடீர் பேட்டிகளாக அமையும். உதாரணமாக எரிப்பொருள் விலையேற்றம் இடம் பெறவுள்ள நிலையில் மக்களின் கருத்துக்களை அறிதல்.

பேட்டியொன்றை பெறும் நோக்குடனான நேர்காணல் துறை சார் வல்லுனர்கள் பிறமுகவர்கள், சாதனையாளர்களிடம் மேற்கொள்ளும் நேர்காணல்.

நேர்காணலை மேற்கொள்ள முன்னர் திட்டமிடல் என்பது முக்கியமானது. ஒரு விடயத்தை அறிய யார். யாரை அணுகலாம். எந்த மூலங்களோடு தொடர்புகளை ஏற்படுத்தலாம். தேவையான விடயங்களை தந்து ஒத்துழைப்பார்களா. என்பதையெல்லாம் திட்டமிட்டு நேர்காணலை தயாரித்தல் வேண்டும். ஒருவரை பற்றிய பேட்டியை திட்டமிடும் போது குறித்த நபரினுடைய பின்னிணியை தெளிவாக அறிந்து வைத்திருத்தல் வேண்டும்.

பேட்டியாளர்களை அல்லது பேட்டி காணும் விடயம் பற்றி முழுமையாக முன்கூட்டியே தெரிந்துக் கொண்டு அவரைப் பற்றிய விடயங்கள் அனைத்தும் தெளிவாக தெரிந்து கொள்ளுதல் வேண்டும்.

செய்தியாளர் முதலில் நேர்காணுவருக்கு முன் தோன்றி தன்னை அறிமுகப்படுத்துவதும் தன்னை பற்றிய மனப்பதிவை ஏற்படுத்துவதும் நல்லது.

செய்தியாளன் போட்டியாளனை அணுகும் போது முதலில் தனது நோக்கைத் தெளிவாக விளக்குதல் வேண்டும்.

கேள்விகளைத் தயாரித்தலும், கேட்கும் முறையியலும் கேள்விகளைத் தயாரிக்கும் போது ஒருவரின் நிலைப்பாடு, அவரது செயல்கள், கருத்துக்கள், என்பவற்றைத் தெளிவாக வெளிக்கொணரத்தக்க கேள்விகளைத் தயாரிக்க வேண்டும். மக்கள் என்ன செய்கின்றார்கள். என்ன செய்ய திட்டமிட்டிருக்கின்றார்கள். என்ன விசேட தகவல்களை வைத்திருக்கின்றார்கள். குறித்த விடயம் தொடர்பாக என்ன நினைக்கிறார்க்ள என்பவற்றையெல்லாம் இங்க வெளிக்கொணர்தல் வேண்டும்.

ஆரம்பக் கேள்வி குறித்த நபரின் பின்னணி, அனுபவம். பணி முதலானவற்றை வெளிக்கொணரத் தக்கதாக அமைய வேண்டும்.

இந்த விடயம் பற்றி என்ன நினைக்கின்றீர்கள். இது பற்றி என்ன அறிந்திருக்கின்றீர்கள். இந்த நேரத்தில் என்ன செய்ய திட்டமிட்டிருக்கின்றீர்கள். முதலான கேள்விகள் விடயத்தை விபரமாக வெளிக்கொணரத் தூண்டும் ஆரம்பக் கேள்விகளாக அமையும்.

கேள்வியின் இறுதியில் பேட்டியாளரைப் பேச அழைக்கின்ற விதமாகச் சில கேள்விகளைக் கேட்டு விடயங்களைத் தூண்டிவிடுதல் வேண்டும். இக் கேள்விகள் விடயத்தை இனங்காண்பவையாகவும் விடயத்தை தெளிவாக செல்பவையாகவும் அமைய வேண்டும். கேளிவிகள் திறந்த கேள்விகளாக அமைய வேண்டும்.

ஆரம்ப கேள்வியின் நோக்கம் போட்டியாளரை பேச வைப்பதாகும். அவர் முழுமையாகப் பேச தொடங்கிய பின்னர் ஆழமான விடயங்களைப் பெற்றுக் கொள்ளும் விதமாக பதிலுக்கேற்ற விதமாக கேள்விகளைக் கேட்பதாக திட்டமிட்டுக் கொள்ளலாம்.

கேள்விகளைக் கேட்கும் போது தூண்டும் வகைக் கேள்விகளைக் கேட்கலாம். இக் கேள்விகள் புதிய தேடலுக்கான ஒரு களத்தை கண்டிபிடித்து தரலாம்.

ஆம்,இல்லை என்ற பதில்களைத் தரத்தக்க மூடிய கேள்விகளை கேட்பது விரும்பத்தக்கதல்ல. எனினும் சில சந்தர்ப்பங்களில் இத்தகைய கேள்விகளும் கேட்கப்படலாம்.

செய்தியாளர் கவனமாகத் தயாரிக்க வேண்டிய மற்றொரு வகை கேள்வி பிரச்சினை கேள்வியாகும். இத்தகைய ஒரு விடயம் நடந்தால் நீங்கள் என்ன செய்வீர்கள் என்ற ஒரு நிலையை உருவாக்கித் தரப்படும் கேள்வியாகும். இதற்கான பதில் கவனத்தோடும் கெட்டித்தனத்தோடும் தரப்பட வேண்டியது.

நேர்காணலைத் தயாரிக்கும் போது நேரம் இடம் என்பவற்றையும் கவனம் செலுத்துதல் வேண்டும். செய்தியாளர் அவசர வேளைகளில் நேர்காணல் மேற்கொள்வதைத் தவிர்த்தல் சிறந்தது. உதாரணம் - அரசியல் கட்சி மாநாட்டில் கலந்து கொண்டு விட்டு அவசரமாக நடந்து செல்லும் வேளை

எப்போதும் நேரத்தை முன்கூட்டியே திட்டமிட்டு கொடுக்கப்பட்ட நேரத்திற்கு ஏற்ற விதமாக கேள்விகளை தயாரித்து அதன்படி பதில்களை பெறுவது சிறந்தது. பேட்டிக்காக போட்டியாளருடைய தங்குமிடம் அல்லது காரியலாயம் போன்ற இடங்களை தெரிவு செய்வது நல்லது. பொறுமையாகவிருந்து விடயங்களை விளக்கமாக தெரிவிக்க பேட்டியாளர்களின் சொந்த இடம் சிறந்தது. இதை விட பேட்டிக்கென்று சிறப்பாக ஒதுக்கப்படும் இடம் நல்லது.

நேர அளவு கணிக்கப்பட வேண்டும். கட்டுப்பாடுகள் இல்லாத போதும் நேருக்குநேர் எடுக்கப்படும் நேர்காணல் 15 நிமிடங்கள் நீடிக்கலாம். தொலைபேசி மூலம் களத்திலிருந்து பெறப்படும் நேர்காணல் ஐந்து நிமிடம் நீடிக்கலாம். ஒரு நீண் ஆழமான நேர்காணல் 45 நிமிடம் 2 மணித்தியாலம் வரை நீடிக்கலாம்.

நேர்காணலை மேற்கொள்வதற்கு காலை நேரம் சிறந்தது. மாலை நேரங்களில் செய்தியாளர் பொறுமையாக இருந்து ஓய்வெடுக்கும் நேரமும் சிறந்தது. மதிய வேளை நேர்காணலுக்கு உகந்ததல்ல.

செய்தியாளரின் ஆளுமை தோற்றம், குண நலம், கேட்கும் பாணி, கேள்வி கேட்கும் விதம், நுணுக்கமாக நடத்திச் செல்லும் விதம் என்பவை முக்கியமானவை.

செய்தியாளன் எப்போதும் நேர்காணலை தனது கட்டுப்பாட்டினுள் வைத்திருத்தல் வேண்டும். பேட்டியாளர் செய்தியாளரிடம் கேள்வி கேட்கும் நிலையை ஏற்படுத்தி விட கூடாது.

செய்தியாளர் எப்போதும் பேட்டியாளரை மனம் புண்படச் செய்யவோ, ஆத்திரமூட்டச் செய்யவோ கூடாது. பேட்டியாளரால் ஏற்கப்படும் நிலையை அடைவதற்காக செய்தியாளர் தம்மை தயாரப்படுத்தி நடுவு நிலைமை உடையவராக தன் நடை, உடை, பாவனையில் இருக்க வேண்டும்.

தர்ம சங்கடமான கேள்விகளைக் கேட்க வேண்டிய நிலை ஏற்பட்டால் அதனை இறுதியில் கேட்பது நல்லது. பேட்டியாளரை பேசும் படி தூண்டிவிட்டு இடையிடையே குழப்பாமல் இருத்தல் வேண்டும்.

பேட்டியாளன் எந்த நிலையில் இருந்தாலும் அவரை வேலைப்பழு உள்ளவராக கருத வேண்டும்.

குறிப்பெடுக்கும், பதிவு செய்யும் போது சில விதிமுறைகளைக் கடைபிடித்தல் வேண்டும்.

பேட்டியாளன் எப்போதும் புரிந்துணர்வு உள்ளவனாக இருத்தல் வேண்டும்.

திடீரென உணர்ச்சிப் பேதங்களை காட்டுவதை தவிர்த்தல் வேண்டும்.

பிரச்சினைகளைத் தீர்க்கவும் தீர்மானங்களை எடுக்கவும் நிறுவனங்கள், சங்கங்கள். தனிநபர்களால் கூட்டங்கள் கூட்டப்படுகின்றன.

அங்கத்தவர்களிடையே தகவல்கள் விரைவாகப் பரவுதல்.

புதிய எண்ணங்கள் உருவாகலாம்.

ஒத்துழைப்பு தூண்டப்படுகின்றது.

பல்வேறுப்பட்ட அபிப்பிராயங்களையும் பகிர்ந்துக் கொள்ளல்.

ஒரு முறையான கூட்டத்தை நடத்துவதற்கு முன்னறிவித்தல், நிகழ்ச்சிநிரல் கூட்ட அறிக்கை முதலிய அம்சங்கள் தேவையாகும்.

கூட்டத்தை தன்னியக்கமாகவும், முன்னறிவித்தல் கொடுத்தும் கூட்டலாம்.

முன்னறிவித்தல் முறை - கூட்டத்தைக் கூட்டுவதற்கான முன்னறிவித்தல் தயாரிக்கப்பட்டு அறிவிக்கப்படும். அச்சிடப்பட்ட அட்டை, துண்டு, கடிதம், விளம்பரப் பலகை அறிவித்தல் முதலியவற்றின் மூலம் கூட்டத்தக்கான அழைப்பை விடுக்கலாம். அந்த அறிவித்தலோடு கலந்துரையாட இருக்கும் விடயங்களும் அதற்குரிய தயாரிப்பைச் செய்ய வழிகாட்டியாக நிகழ்ச்சிநிரலும் சேர்க்கப்படும். சிலபோது கூட்ட அறிக்கையும் இணைக்கப்படலாம்.

கூட்டத்தில் ஒன்றுக்கு மேற்பட்ட விடயங்கள் கலந்துரையாட வேண்டி இருப்பின் அவ்விடயங்களை நிகழ்ச்சி நிரல் எனப் பட்டியலொன்று இடவேண்டும். நிகழ்ச்சிநிரல் கூட்டத்தைக் கால அட்டவணைக்குள்ளும் வரையறைக்குள்ளும் வைத்துக்கொள்ள தலைவருக்கு உதவும். நிகழ்ச்சிநிரல் தெரிவுசெய்யப்பட்ட தலைமை அல்லது செயலாளரால் தயாரிக்கப்பட வேண்டும்.

அங்கத்துவம், புதிய அங்கத்தவரை அறிமுகம் செய்தல், இளைப்பாறியவர், இராஜினாமா செய்தவர்களை அறிவித்தல்.

சமூகமளிக்காமைக்கு மன்னிப்பு: கூட்டம் தொடங்கியதும் கூட்டத்துக்கு வர முடியாதவர்கள் செயலாளருக்கு அனுப்பிய மன்னிப்புக் கடிதங்கள் வாசிக்கப்படுதல் வேண்டும்.

சென்ற கூட்டறிக்கை வாசிக்கப்படல், இங்கு அறிக்கையின் சொற்பிரயோகங்கள், நிகழ்வுகளின் உண்மைத் தன்மை பரிசீலிக்கப்பட்டு திருத்தப்படல் வேண்டும். சரியாயின் சரியென தலைவர் ஒப்பமிடல்.

முன்னைய கூட்டத்தினால் ஒரு நிலைமை விருத்தியடைந்திருந்தால் அல்லது நடவடிக்கை எடுக்கப்பட்டிருப்பின் அதுபற்றி அறிவித்தல்.

அக்கூட்டத்துக்கு ஏற்புடைய கடிதங்கள் வேறு பிரிவினரிடமிருந்து செயலாளருக்கு வந்திருப்பின் அதனை அறிவித்தல்

கூட்டத்தின் புதிய விடயங்கள் நிகழ்ச்சிநிரலில் எடுத்தாளப்படும். இதில் மேற்கொள்ளப்பட இருக்கும் திட்டங்கள், கலந்துரையாடவுள்ள அறிக்கைகள். தீர்மானமெடுக்க இருக்கும் முன்மொழிவுகள் முதலியன சேர்க்கப்படும்.

வேறு விடயங்கள் ஏதாவது விடயங்கள் எடுபடாது விடப்பட்டிருந்தால் அல்லது நிகழ்ச்சிநிரல் தயாரிப்புக்கும் கூட்ட நிகழ்வுக்கும் இடையில் நடந்திருந்தால் அவற்றைச் சேர்த்தல்.

கூட்ட இறுதியில் கூட்டம் முறையாக நிறைவுற்றதெனப் பிரகடனப்படுத்தப்படும். அடுத்த கூட்டத்துக்கான திகதியும் அறிவிக்கப்படலாம்.

நன்றி

நிர்ணயிக்கப்பட்ட ஆகக்குறைந்த எண்ணிக்கையான நபர்கள் சமூகமாயிருத்தல் வேண்டும். இது நிறைவெண் அல்லது கோரம் எனப்படும். கோரம் இல்லையாயின் கூட்டம் பிரிதொரு நாளுக்கு ஒத்தி வைக்கப்படும்.

கூட்டத்தில் ஒவ்வொரு விடயத்தையும் பிரேரணை வடிவத்தில் எடுத்தல் உதவியாக அமையும் கலந்துரையாட எடுத்த விடயத்தையும் தீர்மானிக்க வேண்டிய முக்கிய விடயங்களையும் பிரேரணை விளக்கும். பிரேரணை கூட்டத்தில் விவாதிக்கப்பட்டு சில சமயம் திருத்தப்படும். பிரேரணை ஏற்றக் கொள்ளப்படின் தீர்மானமாக மாற்றமடையும். பிரேரணை பின்வரும் அம்சங்களைக் கொண்டதாக அமைக்கப்படும்.

எதிர்மறையாகவன்றி திட்டமானதாக இருத்தல்

பலபொருள்படாது செயற்பாட்டுக்கு இலகுவாக தேவையான விபரங்களை உள்ளடக்கியிருத்தல்.

பொருத்தமான விதிகள், சட்டவாக்கங்களுக்கு அமைவாக இருத்தல்

அலுவலக இலக்குக்குள் அமைதல்

கூட்டத்தைத் திறம்பட நடத்துவது தலைவரின் பொறுப்பாகும். அந்தவகையில்,

கூட்டத்தின் ஒழுங்கைப் பேணுதல் வேண்டும். நியாயமானவராகவும் பாரபட்சம் இல்லாதவராகவும் கூட்டத்தை நடத்த வேண்டும். கூட்ட நிகழ்ச்சிநிரலுக்கு அமைவாக கூட்டத்தை வைத்திருக்க வேண்டும். ஒரு நேரத்தில் ஒரு நபர்தான் உரையாற்ற முடியும் என்பதை வற்புறுத்தல், தேவை ஏற்படும் போது எச்சரிக்கை செய்தல். தொடர்ச்சியாக குறுக்கீடு செய்யும் அங்கத்தவர்களை வெளியேற்றுதல்.

கூட்ட அறிக்கையை பெரும்பாலும் செயலாளர் தயாரிப்பார். இவ்வறிக்கை பின்வரும் பண்புகளை கொண்டிருக்க வேண்டும்.

சரியாகவும், முழுமையாகவும் கையடக்கமாகவும் தயாரிக்கப்படல்

படர்க்கைப் பேச்சில் எழுதப்படல்.

தனிநபர்கள் மோதல்களையும் வருத்தம் தெரிவிக்கப்பட்டதும் கூட்டத்தின் நற்பெயரைக் கெடுப்பதுமான விடயங்களையும் வேண்டாத வார்த்தைப் பிரயோகங்களை பரிமாறிய விடயங்களையும் நீக்கியும் தயாரித்தல்.

பங்குபற்றியவர்களின் அபிப்ராயங்கள், கூற்றுக்களின் சரியான வடிவத்தைத் தருதல்

வாய்மொழிசாராத தொடர்பாடல் என்பது ஒருவர் மற்றவரோடு தொடர்பாடலை மேற்கொள்ளும் போது மொழிப் பிரயோகங்களைப் பாவிக்காமல் தொடர்பினை மேற்கொள்ளும் முறையாகும். குறியீடுகள், சைகைகள், அங்க அசைவுகள் மற்றும் உடல்மொழி என்பவற்றின் மூலம் தொடர்பாடலை மேற்கொள்ளும் முறையாகும். எமது உடல் அசைவுகள் மூலம் எண்ணங்களையும் கருத்துக்களையும் வெளிப்படுத்தும் முறையாகும். எமது நடை, உடை, பாவனை முறைகள் அனைத்தும் இங்கு தொடர்பாடலை மேற்கொள்கின்றன. மௌனம் கூட ஒரு வாய்மொழிசாராத தொடர்பாடலாகும். காட்சிசார்ந்த அல்லது கட்புலரீதியான தொடர்பாடல்களும் இதனுள் அடங்கும்.

இத்தொடர்பாடல் முறையில் இரகசியமாகத் தகவல் பரிமாற்றம் செய்யப்படுவதோடு, ஏனையோருக்கு அச்செய்தியானது புரியாமல் இருக்கின்றது. ஒரு குழுசார்ந்தோருக்கிடையில் இத்தகைய முறையில் தகவலானது பரிமாற்றப்படுகின்றது. கட்புலரீதியான காட்சிசார்ந்த தொடர்பாடலில் திரைப்படங்கள், வரைபடங்கள், சமிக்ஞைகள் ஆகியன உள்ளடங்குகின்றன. இவற்றினூடாகத் தகவல்களை எளிமையாக எடுத்துக்காட்ட முடிவதுடன், மனதில் பதிய வைக்கவும் முடியும். இத்தொடர்பாடலின் மூலம் கல்வியறிவற்ற மக்களுக்கும் தகவல்களைப் புரிந்துகொள்ள முடியும்.

வாய்மொழிசாராத தொடர்பாடலில் குறிப்பிட்ட சைகைகளையும் குறியீடுகளையும் உடல் அசைவுகளையும் புரிந்துகொண்டவர்களுக்கு மாத்திரமே அக்குறிப்பிட்ட தகவல்களைப் பரிமாற்றம் செய்ய முடியும். சைகைகளுக்கும் குறியீடுகளுக்கும் பொருத்தமான அர்த்தங்கள் தெரிந்தால் மாத்திரமே அத்தகவலைப் புரிந்து கொள்ள முடியும். அல்லது தவறான முறையிலும் பொருள் கொள்ள நேரிடும்.

எழுத்து மூலமான தொடர்பாடல் என்பது. தகவலானது எழுத்து வடிவில் ஒருவரிடமிருந்து இன்னொருவருக்கு அனுப்பப்படும் முறையாகும். இது மொழிசார்ந்த தொடர்பாடலாகவும் முறைசார்ந்த தொடர்பாடலாகவும் உள்ளது. நிறுவனங்களைப் பொறுத்தவரையில் அதிகமாக இத்தொடர்பாடல் முறையானது பின்பற்றப்படுகின்றது. கடிதங்கள், அறிக்கைகள், படிவங்கள், அறிவித்தல்கள், மின்னஞ்சல்கள், வெளியீடுகள், துண்டுப்பிரசுரங்கள், வினாக்கொத்துகள், சுற்றுநிருபங்கள், தொலைநகல், ஞாபகக்குறிப்புகள், ஆவணங்கள், கையேடுகள் ஆகியன எழுத்துமூலமான தொடர்பாடல் வடிவங்கள் ஆகும்.

கடந்தகாலம் பற்றிய தகவல்களையும் பதிவுகளையும் எதிர்காலத்திற்குரிய ஆவணங்களாகச் சேகரித்து வைக்க உதவுதல்.

வரலாற்றின் அடிப்படையில் வளர்ச்சிநிலைகளை ஒப்பீட்டு அறிவதற்கு உதவுதல்.

தகவல்களையும் விளக்கங்களையும் விரிவான முறையிலும் அதிகளவிலும் வழங்குதல்.

தகவல்களைப் பிழையாகவும் அரைகுறையாகவும் விளங்கிக் கொள்வதற்கான வாய்ப்புக்கள் குறைவாகக் காணப்படுதல்.

தகவல்களில் உறுதிப்பாடும் பூரணத்துவமும் காணப்படுதல்.

யார், யாருக்கு, எங்கிருந்து, எப்போது போன்ற தகவல் பற்றிய விபரங்களும் உள்ளடங்கியிருப்பதனால் நம்பகத்தன்மையும் ஏற்புடைமையும் காணப்படுதல்.

எழுத்து மூலமான தொடர்பாடல்முறையானது சட்டபூர்வமான ஆதாரமாக ஏற்றுக்கொள்ளப்படுவதோடு, பாதுகாப்பானதாகவும் இருத்தல்.

எழுத்து மூலமான தொடர்பாடலில் காலவிரயம் ஏற்படுவதற்கான வாய்ப்புக்கள் உள்ளன.

தகவலானது பெறுநரைச் சென்றடைவதற்கும் காலநேரம் எடுப்பதுடன், தகவலானது பெறுநரைச் சென்றடைந்துள்ளதா? புரிந்துகொள்ளப்பட்டு விட்டதா? ஆகிய பின்னூட்டல் செயற்பாடுகளும் குறைவான நிலையில் காணப்படுதல்.

இத்தொடர்பாடல் முறையானது கல்வியறிவற்ற மக்களுக்குப் பொருத்தமற்ற ஒன்றாகவும் காணப்படுதல்.

எழுத்து மூலமான தகவல்களைச் சிறந்த முறையில் ஆவணப்படுத்துவதற்குரிய இடவசதிகளும் ஒழுங்குமுறைகளும் தேவைப்படுதல்.

பெறுநருக்குப் பொருத்தமான மொழிப்பிரயோகத்தைத் தெரிவு செய்வதோடு, பொருள் மயக்கம், இலக்கண வழு, எழுத்துப்பிழை, அச்சுப்பிழை, தெளிவற்ற எழுத்துமுறை, அளவுக்கதிகமான விபரணமுறை, பொருத்தமான நிறுத்தக்குறிகள் உபயோகிக்காமை, சமூக மற்றும் பிரதேச மொழி வழக்குகளின் பாவனை, கடின சொற்பிரயோகங்கள் என்பன இத்தொடர்பாடலில் சிக்கல்களை ஏற்படுத்துதல்.

பண்டைக் காலமிருந்து கடிதங்கள் முதன்மையானதொரு தொடர்பாடல் கருவியாக இருந்துவந்துள்ளது.

இன்று பல்வேறு நவீன தொழில்நுட்பச் சாதனங்கள் வந்துள்ள போதும் கடிதங்கள் அன்றாட நடைமுறைகளில் மட்டுமன்றி அலுவலக நடைமுறைகளிலும் அரசியல், வர்த்தக நடவடிக்கைகளிலும் முதன்மையான தொடர்பாடல் சாதனமாக இருந்து வருகின்றது.

இன்று கடிதங்களை அனுப்பும் முறைகளிலே பல வளர்ச்சிகள் ஏற்பட்டுள்ளன. அந்தவகையில் கடிதங்களின் முக்கியத்துவங்களைப் பின்வருமாறு கூறலாம்,

வரலாற்றுப் பதிவுகளாக அமைந்துள்ளன.

தகவல்களை ஆவணப்படுத்திப் பாதுகாத்து வைக்கலாம்.

ஆதாரத் தன்மையும் சட்டபூர்வத் தன்மையும் கொண்டவை.

நம்பகத் தன்மையும் கொண்டவை.

மாற்றமடையக் கூடியவை அல்ல. நிரந்தரத் தன்மையுடையவை.

ஏளிமையானவை. இலகுவாக தொடர்புகொள்ளத்தக்கவை.

தேவைகளையும் அலுவல்களையும் முறையாக நிறைவேற்றிக் கொள்வதற்குச் சிறந்த ஊடகம்.

விடயங்களைப் பாதுகாப்பாகப் பரிமாறிக்கொள்ள முடியும். பதிவுத் தபால் மூலம் அனுப்பப்படும் தகவல்கள் மிகவும் பாதுகாப்பானவை.

குறைந்த செலவில் தகவல்களைப் பரிமாறிக்கொள்ள முடியும்.

அதிகமான தகவல்களை விரைவாக அனுப்பலாம்.

சாதாரண கடிதங்கள் சென்றடைவதில் காலதாமதங்கள் ஏற்படுவதுண்டு. இதனால் நேரவிரயம் ஏற்படுகின்றது.

எழுத்தறிவு இல்லாதவரோடு கடிதத் தொடர்பு கொள்ள முடியாது.

பின்னூட்டலைப் பெறுவதும் சிரமமாக உள்ளது.

கடிதத்தின் பொது அமைப்பு

கடிதங்கள் பல்வேறு வகைப்படுகின்றன. ஒவ்வொரு வகைக்கும் ஏற்ப தடிதங்களின் தன்மை வேறுபடுகின்றது. அந்தவகையில்,

குறிப்பிட்ட ஒரு விடயம் சம்பந்தமான தகவல்களை ஒன்று திரட்டி அதனை ஒழுங்குபடுத்தி முன்வைப்பது அறிக்கை எனப்படும். அறிக்கை. நிர்வாக, சமூக நடவடிக்கைகளில் மட்டுமன்றி அரசியல், பொருளாதார சமய நடவடிக்கைகளிலும் முக்கியம் பெற்றுக் காணப்படுகின்றது.

முகாமைத்துவ நேரத்தையும் பணத்தையும் மீதப்படுத்துவதன் மூலம் முகாமைத்துவத்திற்கு உதவுகின்றது.

ஒரு சம்பவத்தின் பிரச்சினையின் உண்மைத் தன்மையை வெளிப்படுத்துவதற்கு.

ஒரு பிரச்சினை முரண்பாட்டுக்கான தீர்வினை எடுப்பதற்கு.

எதிர்காலச் செயற்பாடுகளை முறையாகத் திட்டமிட்டுச் செயற்படுத்த.

ஒரு நிரந்தரப் பதிவாகவும் தொடர்புக்கான மூலமாகவும் அமைதல்.

தேவையானவருக்குத் தகவல்களை வழங்குவதற்கு.

அறிக்கையின் தலைப்பு - மட்டக்களப்புத் தமிழ்ச் சங்கத்தின் 2வது ஆண்டறிக்கை

யாருக்கு யாரிடமிருந்து அனுப்பப்படுகின்றது என்பது - யாருக்காக உத்தேசிக்கப்பட்டது. இன்னாருக்குச் சமர்ப்பிக்கப் படுகின்றது என்பது.

எழுதிய திகதி

அதன் கீழ் அறிக்கையின் தராதரம் - அவசரமானது, இரகசியமானது என்பதைக் குறிப்பிடல்

அறிமுகம் - அறிக்கை என்ன விடயம் பற்றியது என்பதை எடுத்துக் கூறுவதாக இது அமையும். அதாவது அறிக்கையின் நோக்கம்.

உறுப்பினர்கள் பற்றி - மன்றங்கள் பற்றிய ஆண்டறிக்கையில்

பிரதான விடயம்

பிரதான விடயங்களுக்குத் தனித்தனியாக தலைப்புக்கள் அல்லது பந்திகள் கொடுக்க வேண்டும்.

அவற்றை ஒன்றன்பின் ஒன்றாகத் தொகுத்துக் கூறுதல். அந்த விடயம் சம்பந்தமான நடைமுறைகள், செயல்முறைகள் பற்றிய விபரிப்பாக அமையும்.

மேற்கொண்ட நடவடிக்கைகள், தொடர்புகள் அல்லது விஜயங்கள்

உசாவிய ஆவணங்கள், கோப்புகள்.

செய்யப்பட்ட கணிப்புகள், பகுப்பாய்வுகள்

முதலியவற்றைச் சுருக்கமாக விளக்க வேண்டும். உதாரணமாக தமிழ்ச்சங்கம் ஒன்றின் ஆண்டறிக்கை ஒன்றிலே குறித்த ஆண்டில் மேற்கொள்ளப்பட்ட செயற்பாடுகள் பற்றிய விபரிப்புகள் இடம்பெறும் கூட்டங்கள். விழாக்கள், தமிழிகைப் போட்டி, நாடக விழா, ஆன்மீக வகுப்புகள்.

பிரதான விடயம் ஒன்றுக்கு மேற்பட்ட விடயங்களாக அமையுமிடத்து பொருத்தமான தலைப்புக்கள், உப தலைப்புக்களுடன் கால ஒழுங்கு, முக்கியத்துவ ஒழுங்கு அல்லது வேறு தர்க்கரீதியான தொடர்புப்படி விளக்கமாக எழுதப்படும்.

சில அறிக்கைகளில் கண்டுபிடிப்புக்கள் கூறவேண்டி இருக்கும் பட்சத்தில் பிரதான விடயத்தின் பின் கூறலாம்.

முடிவுகள் - அடைந்த தீர்மானங்கள் ஏதும் இருப்பின் அவற்றைக் குறிப்பிடலாம். விசாரணைகளின் அடிப்படையில் எடுத்த செயற்பாடு அல்லது அடைந்த தீர்மானங்கள் இங்கு இடம்பெறும்.

சிபாரிசுகள் - தீர்மானம் எடுப்பதற்கு ஏதுவாக விசாரணை செய்யப்பட்ட பிரச்சினைக்கான தீர்வு ஆலோசனைகளையும் தெரிவிக்கலாம். அதாவது சில வகையான அறிக்கைகளுக்கு விதப்புரைகள் எழுதவேண்டி இருக்கும். அப்படியானவற்றுக்கு விதப்புரைகள் என உப தலைப்பிட்டு விதப்புரைகளைச் சுருக்கமாக எழுதவேண்டும்.

அறிக்கையைப் பூர்த்தி செய்த பின்னர் அதனை வாசித்து தேவையான திருத்தங்களைச் செய்தல் வேண்டும். தேவைப்படின் மீண்டும் அறிக்கையை எழுதிக்கொள்ளலாம். கொடுக்கப்பட்ட தகவல்களுக்கு ஆதாரங்களையும் உசாத்துணை களையும் அறிக்கையுடன் இணைத்தல் வேண்டும். இறுதியில் எழுதியவரின் ஒப்பம். பதவி முதலியவை இடம்பெறவேண்டும். ஒரு மன்றத்தின் அறிக்கை (ஆண்டறிக்கை. கூட்டறிக்கை) பெயலாளரால் தயாரிக்கப்பட்டு அவரால் ஒப்பமிடப்படும்.

மட்டக்களப்புத் தமிழ்ச் சங்கத்தின் 10ஆவது ஆண்டறிக்கை

முன்னுரை - கடந்த ஓராண்டு மட்டக்களப்புத் தமிழ்ச் சங்கம் ஆற்றிய கலை, இலக்கிய. சமூகப்பணிகளை அறிக்கையாக வெளியிடுவதில் மகிழ்ச்சி அடைகின்றோம். சங்கத்தின் இத்தகைய பணிகள் நமது பிரதேச மக்களுக்கும் கலை. இலக்கிய ஆர்வலர்களுக்கும் அதிகம் நன்மை அளித்துள்ளன.

சங்க உறுப்பினர்கள் - சங்கத்தின் ஆயுட்கால உறுப்பினர்களாக 20 பேரும் சாதாரண உறுப்பினர்களாக 70 பேரும் உள்ளனர். இவ்வாண்டு மேலும் 20 உறுப்பினர்கள் சாதாரண உறுப்பினர்களாக பதிவுசெய்யப்பட்டுள்ளனர். எனவே எமது சங்கம் வளர்ச்சியை நோக்கிச் செல்வதை மகிழ்வுடன் அறியத்தருகின்றோம். 

கூட்டங்கள் - இந்த ஆண்டில் ஐந்து செயற்குழுக் கூட்டங்கள் நடைபெற்றன. இக்கூட்டங்களிலே பல செயற்றிட்டங்கள் ஆராயப்பட்டு நடைமுறைப்படுத்தப்பட்டுள்ளன. இது தொடர்பான விடயங்கள் அவ்வப்போது பத்திரிகைகளில் வெளிவந்துள்ளன.

விழாக்கள் - கடந்த ஆவணி மாதம் பாரதிக்கு விழா எடுக்கப்பட்டது. இந்த விழாவில் கலை நிகழ்வுகளும் சொற்பொழிவுகளும் இடம்பெற்றன. ஐப்பசி மாதம் பாரம்பரியக் கலை விழா நடாத்தப்பட்டது. இவ்விழாவில் உள்ளூர்க் கலைஞர்கள் கௌரவிக்கப்பட்டமை முக்கிய அம்சமாகும். இவ்விழா சங்கத்திற்குப் பெரும் புகழை ஈட்டித்தந்தது. சங்கம் நடத்திய இந்த விழாக்களின்போது ஒத்துழைப்பு வழங்கியவர்களுக்கும் கலந்து சிறப்பித்தவர்களுக்கும் நன்றிகள்.

இலவச வகுப்புக்கள் - சங்கம் ஞாயிறு தோறும் அறநெறி வகுப்புக்களையும் சங்கீத நடன வகுப்புக்களையும் நடத்தி வருகின்றது. இவ்வகுப்புக்களின் ஊடாக சங்கம் எமது பிரதேச மாணவர்களின் ஒழுக்க சீலத்தையும் சங்கீத நடன ஆற்றலையும் வளர்த்து வருவதை மகிழ்ச்சியுடன் தெரிவித்துக் கொள்கிறோம்.

நன்றி - இந்த ஆண்டில் சங்கத்தின் செயற்பாடுகளை முழுமையாக நிறைவேற்ற துணை புரிந்த உறுப்பினர்களுக்கும் ஒத்தாசைகள் வழங்கிய மக்களுக்கும் நன்றிகளைத் தெரிவித்துக் கொள்கிறோம். சங்கம் நிகழ்வுகளையும் விழாக்களையும் நடத்தியபோது பொருளாதார உதவிகள் புரிந்த அன்பர்களுக்கும் அவற்றில் கலந்துகொண்டு சிறப்பித்த ஆர்வலர்களுக்கும் எமது மனமார்ந்த நன்றிகள்.

அரசியல், சமய, நடைமுறைச் சமூகத் தேவைகளுக்காக பல்வேறுபட்ட ஆக்கங்கள் உருவாக்கப்படுகின்றன. அவற்றில் ஒன்றே துண்டுப் பிரசுரங்கள். மக்களுக்குத் தகவல்களை இலகுவாகப் பரப்புவதற்கு இந்த துண்டுப்பிரசுரங்கள் பெரிதும் பயன்படுகின்றன. இவை பின்வரும் முக்கிய நோக்கங்களுக்காக பிரசுரிக்கப்படுகின்றன.

துண்டுப்பிரசுரங்கள் பல வகைப்படும். அவையாவன,

பல்றுேபட்ட மதங்களும் தமது சமயக் கருத்துக்களைப் பரப்புவதற்கும் மதம் மாற்றுவதற்கும் பக்தி உணர்வை ஊட்டுவதற்கும் துண்டுப்பிரசுரங்களைப் பிரசுரித்து வருகின்றன. ஆங்கிலேயர் ஆட்சிக் காலத்திலே கிறிஸ்தவ மதமாற்றச் செயற்பாட்டுக்கு துண்டுப்பிரசுரங்கள் முக்கியமான ஊடகங்களாக பயன்படுத்தப்பட்டன. இந்தச் சூழலில் சைவசமயக் கருத்துக்களைப் பரப்பவும் அவர்கள் கிறிஸ்தவ மதத்தில் சேர்வதைத் தடுக்கவும் ஆறுமுகநாவலர் போன்றோர் துண்டுப் பிரசுரங்களை முக்கிய கருவியாகப் பயன்படுத்தினர். அதேவேளை இந்தத்துண்டுப் பிரசுரங்கள் இலக்கியத்தின் ஒரு பகுதியாகவும் கருதப்பட்டன.

அரசியல் கட்சிகள் தமது அரசியல் பிரசாரத்துக்காக துண்டுப் பிரசுரங்களைப் பெருமளவு வெளியிட்டு வருகின்றன. முக்கியமாக தேர்தல் காலங்களிலே மக்களைத் தம் பக்கம் ஈர்ப்பதற்காக துண்டுப்பிரசுரங்கள் வெளியிடப்படுகின்றன. இப்பிரசுரங்களிலே கட்சியின் கொள்கைப் பிரகடனங்கள் தமது எதிர்காலத் திட்டங்கள். தாம் செய்த சாதனைகள் என்பவற்றோடு குறித்த அரசியல் கட்சிப் பிரதிநிதிகளை வாழ்த்துதல், எதிர்க் கட்சியினரைப் பழித்துரைத்தல் என்பனவும் முக்கிய விடயங்களாக அமைந்திருக்கும்.

மக்களை அறிவுறுத்தவும் அவர்களுக்கு விழிப்புணர்வை ஊட்டவும் துண்டுப் பிரசுரங்கள் வெளியிடப்படுகின்றன. டெங்கு ஒழிப்பு. பொலித்தீன் ஒழிப்பு, சிறுவர் துஸ்பிரயோக ஒழிப்பு. சூழல் சுத்தம், மது ஒழிப்பு என்பன தொடர்பாக துண்டுப்பிரசுரங்கள் வெளியிடப்படுகின்றன. இத்தகைய துண்டுப்பிரசுரங்களை சுகாதாரத் திணைக்களம், பிரதேச சபை, மாநகர சபை, தொண்டர் நிறுவனங்கள் முதலான நிறுவனங்கள் தயாரிக்கின்றன.

அனர்த்த நிவாரணத்துக்கு உதவி கோரல்

சிரமதான அழைப்பு

பாதுகாப்புத் தொடர்பான வேண்டுகோள்

நோயாளிகளுக்கு உதவி கோரும் பிரசுரம்

இன்று அதிகம் நிலவுகின்றன.

பொருட்கள் தேவைகளை வழங்குவதற்காக, விற்பதற்காக துண்டுப்பிரசுரங்கள் பயன்படுத்தப்படுகின்றன.

வர்த்தக நோக்கம் வர்த்தக நோக்கில் பல்வேறு நிறுவனங்கள் துண்டுப்பிரசுரங்களை வெளியிடுகின்றன. (காணி, நகை விளம்பரம்)

சேவை நோக்கம் - இலவச மருத்துவ சேவை, இலவச கண் பரிசோதனைச் சேவை

கவர்ச்சிகரமான மொழிநடையில் எழுத வேண்டும்.

நிறுத்தற்குறிப் பயன்பாடு, பந்தியமைப்பு

சுருக்கமாகவும் தெளிவாகவும் எழுத வேண்டும்

கருத்துச் செறிவுடன் எழுத வேண்டும்.

மக்களின் கவனத்தை ஈர்க்கக் கூடியதாக அமைதல் வேண்டும்.

நிறப்பயன்பாடு, பிரசுத்தின் அளவு, வடிவம், எழுத்து வடிவம், பயன்படுத்தும் படங்கள் என்பன கவனிக்கப்பட வேண்டும்.

அனைத்து துண்டுப்பிரசுரங்களும் அவசியம் கவர்ச்சியான படங்களுடன் கூடியதாக இருக்க வேண்டும் என்றில்லை. தேர்தல் பிரசாரத் துண்டுப் பிரசுரம், பெண்களுக்கெதிரான வன்முறை ஒழிப்பு. சமூக சீர்கேடு பற்றிய அறிவூட்டல், முதியோரைப் பேணுதல் முதலானவை கவர்ச்சியாக அமைவதில்லை.