கருட புராணம் பகுதி - 03 - GARUDA PURANAM PART - 03

கருடனே... பூமியில் வாழ்ந்து கொண்டிருக்கும் பொழுது பகுத்தறிந்து உணரும் தன்மை கொண்ட மனிதர்கள், தன்னை போன்ற பிற மனிதர்களிடம் இருக்கக்கூடிய பொருட்களை ஏமாற்றியோ அல்லது அவர்களை வற்புறுத்தியோ அவர்களிடமிருந்து கவர்தல் மற்றும் மற்றவர்களின் வாழ்க்கைத்துணையாரை தன் பக்கம் ஈர்த்து அபகரித்தல் போன்ற செயல்களை யார் செய்கின்றார்களோ, அவர்கள் அனைவரும் இறந்த பிறகு வேறு ஒரு சரீரத்தை அடையாமல், எங்கும் அலைந்து திரிந்து கொண்டு இருக்கின்ற காற்று உருவமான பிரேத ஜென்மத்தை அடைகின்றார்கள்.

இறந்த ஒருவரின் உடல் அவர்கள் வீட்டில் இருக்கும்போது இறந்தவரை பற்றி எவ்விதமான கவலையும் அடையாமல், அவர்கள் ஈட்டி வைத்துள்ள பொருட்களின் மீது கண்ணும், கருத்துமாக தன்னுடைய சுயநலமான புத்தியினால் அவர்களுடைய உற்றார், உறவினர்களை வஞ்சித்து இறந்தவர்களின் பொருட்களை அபகரித்து கொள்ளக்கூடிய நயவஞ்சகர்கள், தீய துன்பங்கள் நிறைந்த பல நரகங்களை அடையக்கூடியவர்கள் ஆவார்கள். இறந்த ஒருவருடைய சொத்துக்களுக்கு தொடர்பு உள்ளவர்களை எவ்விதத்திலும் அவர்களை அடையவிடாமல், இறந்தவருடைய சொத்துக்களுக்கு எவ்விதத்திலும் தொடர்பு இல்லாமல், சொத்துக்களை அனுபவித்தவர்கள் யாவரும் பிரேத ஜென்மத்தை எடுத்து துன்பத்தை அடைவார்கள்.

பிரேத ஜென்மம் அடைந்த துர்ஆத்மாக்கள் பசி, தாகத்தோடு தான் வாழ்ந்திருந்த வீட்டினையும், அங்கும் இங்கும் என எங்கும் சுற்றி அலைந்து கொண்டிருப்பார்கள். அந்த வேதனை அவர்களோடு மட்டுமல்லாமல், அவர்களுடைய குடும்பத்தினருக்கும், உறவினர்களுக்கும் அந்த பிரேத ஜென்மம் எடுத்த துர்ஆத்மாக்களால் துன்பத்தை அனுபவிக்க வேண்டிய சூழ்நிலைகள் ஏற்படும். பிதுர் தினங்களில் பித்ருக்களுக்காக செய்யப்படுகின்ற காரியங்களில் அந்த பித்ருக்களை அவர்களுடைய காரியங்களில் பங்கேற்கவிடாமல் வீட்டின் வாசலிலேயே தடுத்து, விரட்டி அடித்து அவர்களுக்கான அவிசுகளை தாங்களே வாங்கி உண்பார்கள்.

பிரேத ஜென்மம் எடுத்த அந்த துர்ஆத்மா வீட்டினை சுற்றிக்கொண்டே இருப்பதினால் அந்த வீட்டில் இருப்பவர்களுக்கும், குடும்பத்தினர்களுக்கும் மகிழ்ச்சி என்பது எட்டாக் கனியாகவே இருக்கும். அவர்கள் எந்த அளவு முயற்சிகள் செய்தாலும் அவர்களால் எந்தவொரு பொருளையும், சுகத்தையும் அனுபவிக்க முடியாது. அவர்கள் கஷ்டப்பட்டு சேர்த்த பொருட்கள் யாவும் இவர்களுக்கும் பயன்படாமல், மற்றவர்களுக்கும் கொடுக்காமல் வீணடிக்கும் சூழ்நிலையை உருவாக்கிவிடும்.

தன்னுடைய வாரிசுகளுக்கு எந்தவொரு மகிழ்ச்சியையும் அழிக்காமல், ஏன்? அவர்களுக்கு புத்திரபாக்கியம் இல்லாமலும், அவர்களுடனே அந்த வம்சம் முடிந்து விடக்கூடிய சூழ்நிலையும் உருவாகிவிடும். ஒருவேளை அவர்களுக்கு முன்பே பேரன், பேத்திகள் இருக்கும் பட்சத்தில் அவர்கள் கொடிய நோய்களினால் பலவிதமான இன்னல்களுக்கும், துன்பங்களுக்கும் உள்ளாவார்கள். பிரேத ஜென்மம் எடுத்தது முதல் ஆத்மாக்களின் மூலம் துன்பங்களை அனுபவிக்க கூடியவர்கள் யார்? என்று கூறுகிறேன் கேட்பாயாக என்றார் திருமால்.

ஒரு குழந்தையானது கரு தரித்து, முதல் மாதம் முதல் பதினாறு மாதம் வரை சிசு என்றும், ஆறு வயது வரை குமரன் என்றும், ஒன்பது வயது வரை பவுண்டரகன் என்றும், பதினாறு வயது வரை கைசோரன் அதாவது, பால்யன் என்றும் அழைக்கப்படுவார்கள்.

ஒரு குழந்தை பிறந்து ஐந்து வயதிற்குள் இறந்து போனால் அந்த குழந்தையின் கர்ம வினைகளை போக்கும் பொருட்டு அக்குழந்தையின் நினைவாக ஊர் குழந்தைகளுக்கு பால் சாதமும், தயிர் சாதமும் கொடுக்க வேண்டும். அந்தக் குழந்தை இறந்த 11 மற்றும் 12 நாட்களில் சாஸ்திரங்களில் கூறியிருக்கும் சில கர்ம நிகழ்வுகளையும் செய்ய வேண்டும். ஐந்து வயதுக்கு மேல் பன்னிரண்டு வயதிற்குள் உள்ள குழந்தைகள் இறந்தவராயின் அவர்களின் கர்ம வினைகளை குறைக்கும் பொருட்டு இறந்த குழந்தையின் பெயரில் விருஷோற்சர்க்கம் செய்ய வேண்டும். இந்த கர்ம நிகழ்வுடன் குடம், கூடை மற்றும் விளக்கு முதலியவற்றை தானம் செய்தல் வேண்டும்.

தானம் செய்யாவிடில் இறந்த குழந்தையானது மறுபிறவியில் மரமாக தோன்றுவார்கள். அவ்விதமாக அவர்கள் தோன்றிய மரத்திலிருந்து காய், கனிகள் (உடல் உறுப்புகள்) என அனைத்தையும் மரமாக தோன்றிய பிறவியில் தானமாக செய்ய நேரிடும். உலகில் பிறக்கும் அனைத்து குழந்தைகளும் தந்தையின் குணத்தினை கொண்டிருப்பார்கள். அதாவது தந்தையை போலவே அவர்களது புதல்வர்களும் இருப்பார்கள். தந்தையின் உருவத்தோற்றமும், குணநலன்களும் அவர்களுடைய குழந்தைகளிடத்திலும் காணப்படும். இது ஏன் நிகழ்கிறது? என்று பார்த்தோமானால் தந்தையின் ஜீவனின் ஒரு பிரிவே அவர்களுக்கு மகனாக பிறக்கின்றார்கள்.

பூமியில் எப்பொழுதும் இருக்கக்கூடியது ஒரு சூரியன் மற்றும் ஒரே ஒரு சந்திரன் ஆகும். நீர் நிரம்பிய பல குடத்தில் பகல் பொழுதில் ஆதவனின் ஒளியில் வைத்து பார்த்தால் அதில் பல சூரியன்கள் இருப்பது போல தோன்றும். இதேபோன்று பௌர்ணமி அன்று இரவில் நீர் நிரம்பிய பல குடங்களை வைத்து சந்திரனை பார்த்தோமானால் பல சந்திரன்கள் இருப்பது போல நமக்கு தோன்றும். ஆனால் இங்கு இருப்பதோ ஒரே சூரியன், சந்திரன் ஆவார்கள். அதனால் ஏற்படுத்தப்பட்ட பிம்பங்கள் என்பது பல நூறு கோடிகளாகவே இருக்கின்றன. அதை போல தான் புத்திரர்களின் பிறப்பும். தந்தையின் அம்சங்களே புத்திரர்களிடம் காணப்படும்... குணங்கள் மற்றும் பண்புகள் யாவும்.

அதனால் தான் தந்தை இறந்தால் மகனும், மகன் இறந்தால் தந்தையும் ஈமக் கிரியைகளை செய்ய வேண்டும். ஒரு தகப்பனாருக்கு எத்தனை பிள்ளைகள் பிறந்தாலும் அத்தனை பிள்ளைகளும் ஏதேனும் ஒரு வழியிலாவது தந்தையினுடைய குணாதிசயங்களையும், உடலமைப்பையும் கொண்டிருக்கின்றார்கள். ஸ்ரீமந்நாராயணன் இவ்விதமாக உரைத்துக் கொண்டிருக்க கருடாழ்வாருக்கு மனதில் ஒரு ஐயம் தோன்றியது. அதாவது கண்பார்வையற்ற அல்லது உடல் ஊனமுற்ற தந்தையருக்கு பிறக்கும் குழந்தைகளும் அவர்களின் சாயலான அதாவது அவருடைய உடல் அமைப்பை கொண்டு இருக்க வேண்டுமே என்று எண்ணத் தொடங்கினார். அதே எண்ணத்தை நாராயணரிடமும் வினவினார்.

சிறப்பான கேள்வியை கேட்டுள்ளாய்... பறவை குலத்து வேந்தனே...!! ஒருவரின் பிறப்பு எந்தவிதமான குறைகளும் இல்லாமல் இருப்பது என்பது அந்த ஜீவனின் முன்ஜென்மத்தில் செய்து இருக்கக்கூடிய புண்ணிய பலன்களின் அடிப்படையில் மட்டுமே. ஒரே நேரத்தில் வௌ;வேறு பெற்றோர்களுக்கு பிறக்கும் குழந்தைகளில் ஒருவர் செல்வந்தருக்கும், மற்றவர் செல்வம் இல்லாமல் வறுமையில் வாடி தவித்து கொண்டு இருக்கக்கூடிய குடும்பத்திலும் பிறப்பு எடுக்கின்றார்கள். எவ்விதமான இல்லத்தில் பிறந்திருந்தாலும் சிலர் ஒழுக்கத்துடனும், சிலர் ஒழுக்கம் இல்லாமல் தவறான வழிகளில் செல்லக்கூடியவர்களாகவும் இருக்கின்றார்கள்.

எவ்விதமான இல்லத்தில் பிறந்திருந்தாலும் சிலர் ஒழுக்கத்துடனும், சிலர் ஒழுக்கம் இல்லாமல் தவறான வழிகளில் செல்லக்கூடியவர்களாகவும் இருப்பதற்கு காரணம் யாது? என்று பார்த்தோமானால் அந்தந்த ஜீவன்கள் முன்ஜென்மத்தில் செய்த கர்ம வினைகளின் (பாவ, புண்ணிய) பதிவுகளே ஆகும். மேலும் அவர்கள் செய்த அந்த வினை பதிவுகளுடன், பெற்றோர்களுடைய வினை பதிவுகளும், அவர்களுடைய முன்னோர்கள் செய்த வினை பதிவுகளும் இதில் சேர்ந்து அவர்களுக்கு குணம் மற்றும் அங்ககீன தோஷங்களையும் உருவாக்குகின்றது.

பாட்டன் செலவு செய்யாமல் கருமியாக இருந்து சொத்துக்கள் பல சேர்த்திருப்பார். ஆனால் அவர்களுடைய பேரன்கள் அந்த சொத்துக்களை கொண்டு தர்ம வழிகளில் செலவு செய்தால் அவர்களின் முன்னோர்களுக்கு வைகுண்ட பதவிகள் கிடைக்கும். ஒருவேளை அவர்கள் ஆடம்பர வகையில் அல்லது தவறான வகையில் பொருள் விரயங்கள் செய்யக்கூடியவராக இருப்பார்களானால் பாவங்கள் உண்டாகும்.

நான்முகன் அளித்த யோசனையில் விருப்பம் இல்லாவிட்டாலும் வேறு வழி இல்லாததால் இதையும் நடைமுறைப்படுத்தாவிட்டால் இவரின் பகைமையும் ஏற்பட்டுவிடுமோ என்று பயந்து நான்முகன் அருளியதை ஏற்று அவ்விதமே விஸ்வரூபனை தேவர்களின் குருவாக நியமிக்கலாம் என்று எண்ணினார். பிரம்ம தேவர் தேவேந்திரனுக்கு கூறியது அவருக்கு அளித்த உதவி மட்டுமல்லாமல் அவரது கர்ம வினையை அனுபவிக்கும் பொருட்டு கூறப்பட்ட உபாயம் ஆகும். இது பிரம்ம தேவரால் செய்யப்பட்ட ஒரு சூழ்ச்சியாகும். இதை உணராத தேவேந்திரனும் பிரம்ம தேவரை வணங்கி தேவர்களின் குருவான விஸ்வரூபனை காண அவர் இருக்கும் இடத்தை நோக்கி செல்லத் துவங்கினார்.

தேவேந்திரன் விஸ்வரூபன் இருக்குமிடத்தை அடைந்து நிகழ்ந்தவற்றை எடுத்துரைத்து தேவர்கள் அனைவரும் குரு இல்லாமல் இருக்கின்றார்கள் என்றும், தாங்கள் அப்பதவியில் இருந்து தங்களை வழிநடத்த வேண்டும் என்றும் வேண்டினார். மேலும், எங்களை தங்களின் சீடனாக ஏற்று, எங்களுக்கு தாங்கள் போதித்தல் வேண்டும் என்றும் வேண்டினார். ஒரு அசுரனான நான் தேவர்களின் குருவாக இருப்பதா? என்ற எண்ணம் விஸ்வரூபனிடம் உண்டாயிற்று. இருப்பினும் இதுவே தேவர்களை பழிவாங்குவதற்கான சந்தர்ப்பமாக இதை பயன்படுத்திக் கொண்டார்.

அதாவது மனதளவில் அசுரர்களின் வெற்றிக்கொடியை அனைத்து லோகங்களிலும் பறக்கவிட வேண்டும் என்றும், தேவர்கள் அனைவரையும் வதம் செய்ய வேண்டும் என்றும் எண்ணத்தை கொண்டே தேவேந்திரனிடம் நான் தங்களின் குருவாக இருக்க சம்மதிக்கிறேன் என்று வாக்குறுதி அளித்தார். உதடுகள் மட்டுமே புன்னகைத்து குருவாக இருப்பதாக கூறினார். இருப்பினும் மனதளவில் அவர்களை பழிவாங்க வேண்டும் என்ற எண்ணத்துடனேயே அவர் தேவர்களின் குருவாக இருக்கத் துவங்கினார்.

பிரகஸ்பதியிடம் நடந்து கொண்ட விதத்தை எண்ணி எண்ணி மிகவும் மனம் குலைந்தார் தேவேந்திரன். இதனால் ஏற்பட்ட தோஷத்தை களைய ஒரு மாபெரும் யாகத்தை நிகழ்த்த வேண்டும் என்ற எண்ணம் கொண்டு புதிய குருவான விஸ்வரூபனிடம் தனது விருப்பத்தை எடுத்துரைத்து ஒரு யாகம் நடத்த வேண்டும் என்றும், அது தேவர்களின் வளர்ச்சிக்காகவும், நான் குருவிடம் செய்த செயல்களால் ஏற்பட்ட விளைவுகளை களையவும் நிகழ்த்தப்பட வேண்டும் என்று கூறினார். விஸ்வரூபனும் யாகத்தை நடத்துவதாக கூறினார். ஆனால், அதில் மறைமுகமாக சில திட்டங்களை செய்யத் துவங்கினார்.

தேவேந்திரனின் விருப்பம் போலவே யாகமும் துவங்கியது. யாகம் துவங்கியதும் விஸ்வரூபன் தேவர் குலம் தழைக்க வேண்டும் என்பதை உதட்டளவில் மட்டும் கூறி மனதளவில் அசுரர்கள் குலம் தழைக்க வேண்டும் என்ற எண்ணம் மேலோங்கி ஒவ்வொரு முறையும் மந்திரங்களை எடுத்துரைத்து யாக வேள்விக்கு நெய்யை ஊற்றி கொண்டிருந்தார்.

விஸ்வரூபன் எடுத்துரைக்கும் மந்திரங்களை அவருக்கு எதிரில் அமர்ந்திருந்த இந்திரதேவன் நன்கு கவனிக்க துவங்கினார். அவர் கூறும் மந்திர சக்திகளின் வலிமையை தனது ஞான திருஷ்டியால் காண தொடங்கினார். அதாவது விஸ்வரூபன் உரைக்கும் மந்திரமானது தேவர்களை பலப்படுத்துவதற்கு பதிலாக அசுரர்களை பலப்படுத்துகின்றது என்பதை அறிந்து கொண்டதும் அவ்விடத்தில் மிகுந்த சினம் கொண்டார்.

சினம் கொண்ட தேவேந்திரன் தனது கரங்களில் இருந்த ஆயுதத்தை விஸ்வரூபனின் மீது ஏவினார். விஸ்வரூபனின் மூன்று தலைகளையும் அது கொய்த்து எரிந்தது. தலையற்ற உடலில் இருந்து விஸ்வரூபனின் ஆன்மாவானது பிரிந்து, அவன் இறக்கத் தொடங்கினான். விஸ்வரூபன் ஒரு அசுரனாக இருக்கும் பட்சத்திலும் அனைத்து வேதங்களையும், சாஸ்திரங்களையும் கற்று உணர்ந்தவராக இருந்து வந்தார். விஸ்வரூபனை கொன்ற குற்றத்தினால் இந்திரனுக்கு பிரம்மஹத்தி தோஷமானது அவ்விடத்தில் பற்றிக்கொண்டது.

பிரம்மஹத்தி தோஷத்தினால் தேவேந்திரன் பாதிக்கப்பட்டதும் அந்த தோஷத்தின் விளைவால் அனைத்து தேவர்களும் பாதிக்கப்பட துவங்கினர். தேவர்களின் பொலிவானது சிறுக சிறுக குறையத் துவங்கியது. இதை அறிந்ததும் தேவர்கள் அனைவரும் ஒன்று சேர்ந்து இந்திரனுக்கு ஏற்பட்ட தோஷமான பிரம்மஹத்தி தோஷத்தை போக்க தங்களால் இயன்றளவு முயற்சி செய்யத் துவங்கினர்.

தேவேந்திரனான இந்திரனுக்கு ஏற்பட்ட இந்த தோஷத்தை போக்க பூவுலகில் இருந்த மரங்கள், மண், நீர் மற்றும் அனைத்து மானுட பெண்களுக்கும் அதை சமமாக பங்கிட்டுக் கொடுத்துவிடலாம் என்று மற்ற தேவர்கள் எண்ணினர். இந்த தோஷத்தினால் ஏற்படும் விளைவுகளை நாங்கள் எவ்விதத்தில் நீக்கிக்கொள்ள முடியும்? என்று தோஷம் ஏற்ற நால்வரும் தேவர்களிடம் வினவினார்கள். தேவர்கள் அவர்களின் வினாவிற்கு விடை அளிக்கும் பொருட்டு நீருக்கு தோஷமானது நுரையாகவும், மண்ணிற்கு தோஷமானது உவர் மண்ணாகவும், பெண்களுக்கு தோஷமானது பூப்பாகவும், மரத்திற்கு அதிலிருந்து வெளிப்படும் பிசினாகவும் பிரம்ம தோஷமானது கழியும் என்று கூறினார்கள்.

தேவ குல வேந்தனுக்கு ஏற்பட்ட இந்த தோஷத்தினை நாங்கள் ஏற்பதினால் எங்களுக்கு ஏதாவது நன்மை உண்டாகுமா? என்று வினவினார்கள். ஒவ்வொரு செயலுக்கும் ஒவ்வொரு பலன் இருப்பது போல நீங்கள் ஏற்கும் இந்த தோஷத்தினால் உங்களுக்கு நன்மையே உண்டாகும் என்று கூறினார்கள். அதாவது, மண் ஏற்ற தோஷத்தினால் மண்ணில் சகல உயிர்களும் உயிர் வாழத் தேவையான அனைத்து விதமான பயிர் விளைச்சலும் உண்டாகும் என்றும், நீரானது இறைக்க இறைக்க ஊறும் என்றும், மரங்களில் இருந்து வெளிப்படும் காய், கனிகள் அனைவருக்கும் பயனை அளித்து நீண்ட நாட்கள் உயிர் வாழும் என்றும், பெண்ணானவள் தன் கருவில் இருக்கும் குழந்தை பிறக்கும் வரையிலும் தன் கணவரோடு கலந்து மகிழ்ச்சி அடையலாம் என்றும் தேவர்கள் வரமளித்தார். தோஷத்தின் பலமானது குறையத் துவங்கியதும் தேவர்கள் அனைவரும் முன்பு போலவே தங்களது பொலிவை பெறத் துவங்கினர்.

பெண் மாதவிலக்கான முதல் நான்கு நாட்களுக்கு மற்றவர்கள் பார்வையில் படக்கூடாது. காரணம் யாதெனில் இந்திரன் பெற்று இருக்கக்கூடிய பிரம்மஹத்தி தோஷம் பெண்களை பிடித்து இருப்பதினால் அந்த தோஷம் அவர்களை மட்டும் பாதிக்காமல், அவர்களை காண்போரையும் பாதிக்கின்றது. மாதவிலக்கு அடைந்த பெண்ணானவள் முதல் நாளன்று கொலை செய்த கொலைகாரி போன்றும், இரண்டாம் நாள் கொள்ளையடித்தவள் போன்றும், மூன்றாம் நாள் அழுக்குகள் நிறைந்து இருக்கக்கூடிய ஆடை போன்றும், நான்காம் நாளில் ஓரளவு தூய்மை அடைந்தவளாகவும் இருப்பாள்.

மங்கையினுடைய கருவறை (கர்ப்பப்பை) ஆனது ஆரோக்கியமானதாகவும், நல்ல நிலையிலும் இருக்கும் பட்சத்தில் கலவி செய்த ஐந்தாம் நாளில் சுரோணியத்துடன் (முட்டையுடன்) சுக்கிலம் இணைந்து ஒரு குமிழி உண்டாகும். குமிழியானது பதினான்கு நாட்களுக்குள் தசையின் வளர்ச்சி அதிகரிக்கும். இருபதாவது நாட்களில் மென்மேலும் தசைகளின் வளர்ச்சி உண்டாகும். கருவுற்ற முப்பதாவது நாட்களில் பஞ்சபூதங்களின் சேர்க்கை ஏற்படும்.

கருவுற்ற இரண்டாவது மாதத்தில் உடலுக்கு உரிய தோலானது உருவாக துவங்குகின்றது.

கருவுற்ற மூன்றாவது மாதத்தில் உடலில் இருக்கக்கூடிய நரம்புகள் யாவும் உருவாகின்றன.

கருவுற்ற நான்காவது மாதத்தில் புற அமைப்புகளும் உருவாகின்றது.

கருவுற்ற ஐந்தாவது மாதத்தில் காது, மூக்கு, மார்புகள், முடியும் தோன்ற துவங்குகின்றன.

கருவுற்ற ஆறாவது மாதத்தில் கழுத்தும், தலையும் உருவாகின்றன.

கருவுற்ற ஏழாவது மாதத்தில் கருவானது இனப்பெருக்க உறுப்பின் வளர்ச்சி முழுமை பெற்று சிசுவானது ஒரு ஒருங்கிணைந்த இயக்கத்தை வெளிப்படுத்த துவங்குகின்றது.

எட்டாவது மாதத்தில் உடலில் இருக்கக்கூடிய அனைத்து உறுப்புகளும் பரிபூரணமாக உருவாகி சிசுவின் உடலில் முன் ஜென்ம வினை பதிவுகளுக்கு ஏற்ப உயிரானது (ஆன்மாவானது) செலுத்தப்படுகின்றது.

ஒன்பதாவது மாதம் சுழிமுனை என்ற நாடியின் மூலத்தை சிசுவானது அடைகின்றது.

பத்தாவது மாதத்தில் தாயின் கருவறையிலிருந்து வந்த குழந்தையானது தன்னுடைய பிஞ்சு பாதங்களால் உதைத்து கருவறையை திறக்க முயற்சிப்பதால் தாய்க்கு பிரசவ வலி ஏற்படுகின்றது.

கருடா...!! நீ முன்பே கூறியது போல மனித உடல் என்பது விசித்திரமானதாகவும், மாயமான ஒரு வியக்கத்தக்க கட்டமைப்பை கொண்டிருக்கக்கூடியதாகவும் இருக்கும். ஏனெனில் மனிதனின் உடல் பஞ்சபூதங்களும், பஞ்ச இந்திரியங்களும், தச நாடிகளும் இணைந்து உருவானதாகும். (தச நாடிகள் என்பது பிராணன், அபானன், வியானன், உதானன், சமானன், நாகன், கூர்மன், கிருகரன், தேவதத்தன், தனஞ்செயன் என்பதாகும்).

மனிதனின் சரீரம் என்பது சுக்கிலம், எலும்பு, நீர், ரோமம், ரத்தம் ஆகியவற்றால் உருவாக்கப்பட்டதாகும். இவைகள் அனைத்தும் நரம்புகளால் கட்டமைக்கப்பட்டு இருக்கின்றன. இவ்விதமாக திருமால் எடுத்துரைத்துக் கொண்டிருக்கும் பொழுது கருடாழ்வார் மனிதனின் உடலில் பஞ்சபூதங்கள் எவ்விடத்தில் இருக்கின்றன? என்பதை பற்றி உரைத்திட வேண்டும் என்று வினவினார்.

பூமியில் தோன்றுகின்ற அனைத்து உயிரினங்களிலும் பஞ்சபூதங்களின் குணங்கள் நிறைந்துதான் இருக்கின்றன. பஞ்சபூதங்கள் இல்லை என்றால் எந்த உயிரினங்களும் இல்லை என்று கூறிய திருமால் மனித உடலில் பஞ்சபூதங்கள் எவ்விடத்தில் அமைந்திருக்கின்றன? என்பதை பற்றி எடுத்துரைக்க துவங்குகின்றார். பஞ்சபூதங்கள் என்பது மண், நீர், நெருப்பு, காற்று, ஆகாயம் ஆகும்.

மண்ணின் குணம் என்பது தன்னிடமிருக்கும் விதையினை வளர்ப்பதாகும். அதேபோல்தான் மண்ணின் குணமும் மனிதர்களின் உடலில் நிரம்பியிருக்கின்றன. மண்ணின் குணத்தினால் எலும்பு, தலை முடி, உடல் தசைகள், நகங்கள், புற தோல்களும் ஏற்படுகின்றன. நீரின் குணம் என்பது இருக்கும் இடத்தினை குளிர்விப்பதாகும். அதேபோல் மனிதனின் உடலில் உள்ள வெப்பத்தினை குளிர்விக்கும் பொருட்டு உற்பத்தியாகக்கூடிய உமிழ்நீரும், சிறுநீரும், சுக்கிலமும், நிணநீரூம் நீரின் குணத்தினை கொண்டிருப்பதாகும்.

நெருப்பின் குணம் என்பது தன்னுடன் சேர்ந்த பொருட்களை தன்னுடனே எரிக்கும் குணம் கொண்டதாகும். அதாவது, மனிதர்களின் உடலில் ஏற்படக்கூடிய பசி, தாகம், தூக்கம், சோம்பல், புத்துணர்ச்சி முதலியவை நெருப்பின் குணத்தினால் ஏற்படக்கூடியவை ஆகும். காற்றின் குணம் என்பது ஓரிடத்தில் நிலையில்லாமல் இருப்பது போல பல இடங்களில் சுற்றித்திரியும் தன்மை கொண்டதாகும். அதே தன்மை கொண்ட கோபம், இச்சை, மடம், பயம், மோகங்கள் போன்றவை காற்றின் குணத்தினால் ஏற்படக்கூடியவைகளாகும். ஏனென்றால் இவைகள் நிலையானதல்ல.

ஆகாயம் என்பது பரந்து விரிந்து இருக்கக்கூடிய விசாலமான அமைப்பினை கொண்டதாகும். மனிதர்களிடத்தில் எழும்பும் கேள்விகள், எண்ணங்கள், கம்பீரமான சிந்தனைகள், ஆன்ம சக்திகள் மற்றும் சப்தங்கள் போன்றவை ஆகாயத்தின் மூலம் ஏற்படுகின்றன. சுருக்கமாக கூற வேண்டுமென்றால் 'அண்டத்தில் உள்ளவைகள் யாவும் பிண்டத்தில் இருக்கின்றன". இதுவே மனிதனின் பிறப்பில் உள்ள ரகசியம் ஆகும். கருடனே...!! இவைகள் யாவும் மனித குலத்திற்கு நன்மை அளிக்கும் பொருட்டு உன் மூலமாக பிறப்பின் ரகசியத்தை யாம் உமக்கு உரைத்தோம். நீ மேற்கொண்டு ஏதேனும் அறிய விரும்புகின்றாய் என்றால் என்னிடம் கேட்பாயாக... என்று திருவாய் மலர்ந்து அருளினார்.

எமலோக பயணம் மேற்கொள்ளக்கூடிய பாதையில் சிறிது தூரம் வரை நெருப்பிலிருந்து வெளிப்படக்கூடிய அனல் போன்றதாக ஒரு பகுதி நிரம்பி காணப்படும். அந்த அனல் போன்ற பகுதியை தாண்டி சென்றதும் சிறிது தூரம் வரை முட்களும், தீக்கொள்ளிகளும் நிரம்பி காணப்படும். அதற்கு அடுத்து அந்த ஆன்மா மேற்கொள்ளக்கூடிய பயணம் என்பது சிறிது தூரம் வரை தாங்கமுடியாத உடல் இல்லாத அந்த ஆன்மாவை வாட்டி வதைக்கக்கூடிய குளிராக இருக்கும் பகுதியில் செல்ல வேண்டும்.

பூலோகத்திற்கும், எமலோகத்திற்கும் இடையே இருக்கக்கூடிய தொலைவு என்பது 86,000 காதங்கள் ஆகும். வாழும் காலத்தில் புண்ணியங்கள் எதையும் செய்யாமல் பாவங்கள் செய்த ஆன்மாக்களுக்கு அந்த வழி நெடுகிலும் நிழல்கள் எதுவுமில்லாமல் தாகத்தை தணிப்பதற்காக நீரும் கிடைக்காமல் செல்ல வேண்டிய சூழ்நிலைகள் அமையும். எமலோகத்தில் கிடைக்கும் தண்டனைகளுக்கு முன்பாகவே அவர்களுக்கு இந்த பயணமே மிகப் பெரிய தண்டனையாக காணப்படும்.

கருடா... எமலோக பயணங்களை பற்றி அறிந்து கொண்ட நீ எமலோகம் பற்றியும், அதனுடைய தன்மைகள் பற்றியும் புரிந்து கொள்வாயாக... எமலோகம் தென் திசைக்கும், வட திசைக்கும் மையத்தில் வஜ்ரம் போன்று மிகவும் உறுதியானதாக, யாராலும் அசைக்க முடியாத அளவிற்கு உருவாக்கப்பட்டு இருக்கக்கூடியதாகும். ஏன் எமனின் அனுமதி இல்லாமல் தேவர்களாலும், அசுரர்களாலும் கூட எமலோகத்தை நெருங்கவோ, சிதைக்கவோ இயலாது.

எமலோகத்தின் மையத்தில் சம சதுர அளவில் எமதர்மனின் மாளிகை அமைந்திருக்கும். அந்த மாளிகை அமைந்திருக்கும் பரப்பு என்பது நூறு யோசனை அளவில் இருக்கக்கூடியதாகும். (யோசனை என்பது ஆதிகாலத்தில் தொலைவினை அளக்க பயன்படுத்தப்பட்ட ஒரு வேத கால அலகாகும். யோசனையில் சரியான அளவு என்பது எதுவரை என்று இன்றளவும் தெரியவில்லை. ஆனால், அறிஞர்களின் கூற்றுப்படி யோசனை என்பது 4 மைல்களிலிருந்து 9 மைல்கள் வரை இருக்கலாம்.)

எமதர்மனின் மாளிகையானது 25 யோசனை அளவு உயரத்தினை கொண்டிருக்கும். மாளிகை எண்ணற்ற சாளரங்களுடன் (ஜன்னல்கள்) அமைக்கப்பட்டிருக்கும். அழகிய கொடிகளாலும், முத்து கோவைகளாலும், கண்களை பறிக்கக்கூடிய பலவிதமான வண்ணங்களில் இருக்கக்கூடிய தோரணங்களாலும் மாளிகையானது அலங்கரிக்கப்பட்டிருக்கும். எமலோகத்தில் இருக்கக்கூடிய மண்டபங்களும், அந்த மண்டபங்களில் நிறுத்தி இருக்கக்கூடிய தூண்களும் வைரங்களினால் இழைக்கப்பட்டு இருக்கும்.

அந்த எமலோக மண்டபத்தில் அழகான தோற்றமுடைய ஒரு இடத்தில் எப்பொழுதும் இனிய இசைகளும், ஆடல்களும், பாடல்களும் இடைவிடாது நடந்து கொண்டே இருக்கும். எமதூதர்கள் பணிவுடன் கரம் குவித்த மனமாக நிற்க, மண்டபத்தின் நடுவிலேயே எமதர்மன் அமர்ந்திருப்பார். அவர் மற்றவர்கள் அஞ்சும் படியாக அகோரமாகவும், கம்பீரமாகவும் தோற்றம் கொண்டு இருந்தாலும், அவருடைய முகத்தில் எப்பொழுதும் மகிழ்ச்சியானது இருந்து கொண்டே இருக்கும். தன் பெரிய மீசையை நீவி விட்ட வண்ணமாக ஆனந்தமாக இருப்பார்.

எமதர்மனுடைய மண்டபத்தின் அருகிலேயே சித்ரகுப்தனுடைய அரண்மனை அமைந்துள்ளது. சித்ரகுப்தனின் மண்டபமானது இருபத்தைந்து யோசனை நீளமும், அகலமும் கொண்டிருக்கும். அரண்மனையானது பத்து யோசனை அளவு உயரம் இருக்கும். சித்ரகுப்தனின் அரண்மனையானது காண்போர் வியக்கும் வகையில் எழில்மிகு தோற்றத்துடன் அலங்கரிக்கப்பட்டிருக்கும். அந்த மண்டபத்தின் நடுவில் சித்ரகுப்தன் சகல ஜீவாத்மாவின் பாவ, புண்ணிய கணக்குகளை ஒன்றுவிடாமல் கணக்கில் கொண்டிருப்பான். சித்ரகுப்தன் கணக்கில் இதுவரை எந்தவித தவறும் ஏற்பட்டதில்லை. ஒவ்வொரு வினைப் பதிவுகளும் சரியான முறையில், அதற்குண்டான பாவ, புண்ணியங்களும் குறிப்பிடப்பட்டிருக்கும்.

சித்ரகுப்தனுடைய அரண்மனையை சுற்றிலும் கொடிய வியாதிகளை உருவாக்கக்கூடிய கிரகங்களும் இருக்கின்றன. அதாவது ஒவ்வொரு கிரகமும், ஒவ்வொரு விதமான நோயை உருவாக்கும் தன்மையை கொண்டிருக்கும். சித்திரகுப்தனுடைய அரண்மனையின் கிழக்கு திசையில் கொடிய சுரமும், தெற்கில் சூலை மற்றும் வைசூரி நோயை உருவாக்கக்கூடிய கிரகங்களும், மேற்கு திசையில் காலத்திற்கு ஏற்றவாறு நோய்களை உருவாக்கக்கூடிய வயிறு சம்பந்தப்பட்ட நோயை உருவாக்கக்கூடிய கிரகங்களும், வடக்கில் உடல் நோய்களை உருவாக்கக்கூடிய கிரகங்களும், தென்கிழக்கே வலிப்பு, மயக்கம் போன்ற நோய்களை உருவாக்கக்கூடிய கிரகங்களும், தென்மேற்கு திசையில் பேதி, காலரா போன்ற வியாதிகளை உருவாக்கக்கூடிய கிரகங்களும், வடமேற்கில் ஜன்னி நோயை உருவாக்கக்கூடிய கிரகங்களும் தனித்தனியே தங்களுக்கு என்று மனைகளை அமைத்து அவ்விடத்தில் இருக்கின்றன.

நோய்களை உருவாக்கக்கூடிய கிரகங்கள் யாவும் எமதர்மனின் உத்தரவிற்கு காத்து கொண்டிருக்கும். (கால நிலைகளுக்கு ஏற்ப எமதர்மனின் உத்தரவுப்படி நோய்கள் பரவ தொடங்குகின்றன. இதனால் பூமியில் வாழும் மனிதர்கள், உயிரினங்கள் யாவும் நோய்வாய்ப்பட்டு துன்பத்தை அடையும் அல்லது மரணத்தையோ அடையும். இவைகள் யாவும் பிறப்பு, இறப்புகள் சரிசம விகிதத்தில் இருக்கும் பட்சத்தில் எமனின் உத்தரவின் அடிப்படையில் நிகழும். எமனின் பார்வையிலும், சித்ரகுப்தனின் கணக்கிலும் பகுத்தறிந்து உணரும் மனிதனும், வாயில்லா உயிரினங்களும் ஒன்றே. இரண்டிற்கும் எவ்விதமான வேறுபாடுகளும் கிடையாது.)

நாராயணன் இவ்விதமாக உரைத்து கொண்டிருக்க கருடாழ்வாரும் நாராயணனிடம் பிரபுவே...!! பாவம் இழைத்தவர்கள் எவ்விதத்தில் தண்டிக்கப்படுகின்றார்கள்? என்பதை எடுத்துரைக்க வேண்டும் என்று வேண்டினார். கருடனே...!! ஏற்கனவே பாவம் இழைத்தவர்கள் எவ்விதம் தண்டிக்கப்படுகின்றார்கள் என்பதையும் உரைத்துள்ளேன். மீண்டும் அவர்களுக்கு எவ்விதம் தண்டனைகள் அளிக்கப்படுகின்றன? என்பதையும் உரைக்கின்றேன் கேட்பாயாக... என்றார் திருமால். பூமியில் வாழ்ந்து கொண்டிருக்கும் காலங்களில் நன்மைகள் செய்ய பல வாய்ப்புகளும், சூழ்நிலைகளும் அமைந்தாலும் நன்மைகள் ஏதும் செய்யாமல் மற்றவர்களுக்கு துன்பங்களையும், பாவங்களையும் செய்தவர்கள் இங்கு பல வகையில் துன்பப்படுவார்கள்.

உடல் இல்லாத ஜீவாத்மாக்கள் பாவம் செய்யப்பட்டு இருக்கையில் அந்த ஆன்மாக்களை உலக்கையால் அடித்து எமகிங்கரர்கள் துன்புறுத்துவார்கள். சில கூரிய ஆயுதங்களினால் அல்லது முட்கள் பொருத்தப்பட்ட ஆயுதங்களை கொண்டும், கூர்மையான கத்தி கொண்டும் உடல் இல்லாத ஆன்மாவானது துன்பப்படுத்தப்படுகின்றது. சிலர் செக்கிலிட்டு ஆட்டி வதைக்கப்படுவார்கள். கொடுமைகள் செய்த ஆன்மாக்களை இரும்பு கம்பியில் கோர்த்து அனல் பொருந்திய பெரும் தீயில் வாட்டி வதைக்கப்படுவார்கள். சில ஆத்மாக்களை கொதிக்கும் அக்னி குண்டத்தில் கிடத்தி அவர்களை வேகும் படியாக வைப்பார்கள். நரகத்தில் கொடுக்கப்படும் தண்டனைகள் என்பது ஜீவாத்மாக்கள் செய்த பாவங்களுக்கு ஏற்ப கொடுக்கப்படுகின்றன.

பூமியில் வாழ்ந்து கொண்டிருக்கும் போது ஆசை வார்த்தைகளை கூறி நயவஞ்சகமாக அல்லது விருப்பமில்லாமல் வலுக்கட்டாயமாக பிற கன்னியர்கள் உடனோ, பிறர் மனைவியுடனோ கூடி வாழ்ந்தாலும் அல்லது அவர்களுடன் கூடி களித்துக் கொண்டிருக்கும் ஆடவர்களுக்கும், திருமணமான மாற்றான் கணவருடன் கூடி களித்து கொண்டிருக்கக்கூடிய மங்கையர்களுக்கும், நரகத்தில் கொடுக்கப்படும் தண்டனை யாதெனில் பூலோகத்தில் வாழ்ந்து கொண்டிருக்கும் பொழுது எந்த சுகத்திற்காக மற்றவர்களின் வாழ்க்கையை கெடுக்கிறார்களோ... அதே சுகத்திற்காக நரகத்தில் செம்பினால் செய்யப்பட்டு எப்போதும் அனலினால் சூடேற்றப்படக்கூடிய ஆடவர் மற்றும் மங்கையர்களை கட்டித் தழுவ வேண்டும்.

விருப்பமில்லாமல் கன்னியர்களை தங்களது இச்சைக்கு கட்டாயப்படுத்தக்கூடிய பகுத்தறிவாளர்களான நயவஞ்சகர்கள் இவ்விடத்தில் கட்டாயமாக எப்பொழுதும் கொதித்துக் கொண்டே இருக்கக்கூடிய செம்பினால் செய்யப்பட்ட பதுமைகளால் கட்டி அணைக்கப்பட்ட நிலையில் ஒட்ட வைத்து விடுவார்கள் எமகிங்கரர்கள். தாமிரத்தால் செய்யப்பட்ட அந்த பதுமையானது எப்பொழுதும் அனலினால் சூடேறி கொண்டே இருக்கும்.

அந்த சூடானது உடல் இல்லாத ஆன்மாவிற்கு பலவகையில் துன்பத்தை ஏற்படுத்தும் வண்ணமாக இருக்கும். பூமியில் வாழும் பொழுது நன்மை, தீமை எதுவென்று பகுத்தறிந்து உணரும் பகுத்தறிவாளர்கள் சிறிது நேர சுகத்தினால் நரகத்தில் பல காலத்திற்கு தாமிரத்தால் உருவாக்கப்பட்ட பதுமையை கட்டித் தழுவிய வண்ணம் துன்பத்தை அனுபவித்துக் கொண்டே இருப்பார்கள்.

இதேபோன்று திருமணமான பெண்கள் கணவருக்கு துரோகம் செய்து மற்றவர்களுடன் கூடி தழுவுகின்ற ஒழுக்கம் இல்லாத மங்கையர்களும், ஆசை வார்த்தைகளை கூறி மற்றவர்களின் மனதை மயக்கி தன்னுடைய தேவைகளை நிறைவேற்றிக் கொள்ளக்கூடிய மங்கையர்களும் இறந்த பின்பு உடல் இல்லாத நிலையில் இதே நரகத்தில் தாமிரத்தால் செய்யப்பட்ட எப்பொழுதும் சூடேறி கொண்டு இருக்கக்கூடிய ஆடவர்களை கட்டித் தழுவ வேண்டும்.

ஆகவே பூமியில் வாழ்ந்து கொண்டு இருக்கக்கூடிய ஆண்கள், பெண்கள் தங்களது ஒழுக்க நிலைகளை தவறாமல் வாழ வேண்டும். இல்லையென்றால் சிறிது நேர சுகமானது நரகத்தில் பல கால தண்டனையாக அதாவது, சூடான தாமிர ஆடவர் அல்லது மங்கைகளை கட்டித் தழுவ வேண்டிய நிலை உண்டாகும். ஆகவே ஒவ்வொரு ஆடவரும், மங்கையரும் அவரவர்களுக்கு உண்டான ஒழுக்க நிலைகளுடன் கண்ணியமாக வாழ வேண்டும்.

கருடனே...!! இந்த தண்டனைகள் மட்டுமல்லாமல் இன்னும் மேற்கொண்டு பல தண்டனைகள் நரகத்தில் கொடுக்கப்படுகின்றன. அவைகளையும் உரைக்கின்றேன் கேட்பாயாக... என்றார் திருமால். கரும்பு ஆலைகளில் விடப்படக்கூடிய கரும்பின் நிலை என்னவாகும்? என்பதை நீ அறிவாய் அல்லவா?... அதைப்போலவே தான் சில பாவம் செய்த பாவ ஜீவாத்மாக்கள் நசுங்கி பாதிக்கப்படுகின்றார்கள். இன்னும் சில அல்ல பல ஜீவாத்மாக்கள் வாழும் காலத்தில் பாவம் செய்யும் பொழுது மகிழ்ச்சியாக வாழ்ந்த பின்பு உடல் இல்லாத நிலையில் நரகத்தை அடையும் ஆன்மாக்கள் மலம், சிறுநீர், கோழை முதலியவற்றால் நிரம்பிய குழிகளில் தள்ளப்படுவார்கள்.

குழிகளில் இருக்கக்கூடிய மலம், சிறுநீர் ஆகியவற்றின் நாற்றத்தை தாங்க முடியாமல் குழிகளின் உள்ளே இருக்கக்கூடிய பாவம் செய்த ஜீவாத்மாக்கள் வெளியே தலை தூக்கும் பொழுது காவலில் இருக்கக்கூடிய எமகிங்கரர்கள் அந்த ஜீவனை தங்களின் கரங்களில் இருக்கக்கூடிய கூர்மையான ஆயுதங்களால் குத்தி கொடூரமாக தாக்கி மீண்டும் அதே குழியில் தள்ளுவார்கள்.

பூமியில் மனிதனின் கழிவுகளில் இருந்து உற்பத்தி ஆகக்கூடிய புழுக்கள் கொடும் பாவம் செய்த ஜீவாத்மாக்களின் வாயிலும், மூக்கிலும், ஏன் காதுகளிலும் புகுந்து பலவிதமான துன்பங்களை அவ்விடத்தில் உருவாக்கும். பாவ செயல்களின் மூலம் உடலினால் அனுபவித்த இன்பங்கள் யாவும் நரகத்தில் அதைவிட பன்மடங்கு துன்பம் தரும் வகையில் பாவம் இழைத்த ஜீவாத்மாக்கள் அனுபவிக்கின்றன. அந்த குழியில் தள்ளப்படக்கூடிய ஜீவாத்மாக்கள் சொல்ல முடியாத வகையில் இன்னும் பலவிதமான துன்பங்களையும், கஷ்டங்களையும் அனுபவிக்கின்றன. சுற்றுப்புற சுவர்கள் மேடும், பள்ளமும் உள்ள பாறைகளால் உருவாக்கப்பட்டிருக்கும்.

தான் படிக்கவில்லை என்றாலும் தனது பிள்ளையாவது படிக்க வேண்டும் என்ற எண்ணத்தோடு பலவித துன்பங்களுக்கு மத்தியில் பெற்றோர் தான் ஈட்டிய பணத்தினை கொண்டு படிக்க அனுப்பியும் படிக்காமல் சோம்பேறித்தனமாக சுற்றித்திரிந்து தவறான வழிகளில் செல்லக்கூடிய கசடர்களும், கன்றுக்கு பால் கொடுக்காமல் பசுவின் மடியில் இருக்கக்கூடிய முழு பாலையும் கறக்கூடியவர்களும், வீட்டிற்கு வந்து இருக்கக்கூடிய உறவினர்கள் பசியான நிலையில் இருக்க தாம் மட்டும் சுகமாக உண்டு வாழ்ந்தவர்கள்.

வேலைகளை பல மணி நேரம் வாங்கி கொண்டு அதற்கு குறைந்த அளவு ஊதியம் கொடுக்கக்கூடியவர்களும், மறைமுக சக்திகளை தவறான வழியில் பயன்படுத்தி அதாவது பில்லி, சூனியம் போன்றவற்றை வைத்து நன்றாக வாழ்ந்து கொண்டிருக்கக்கூடிய குடும்பங்களையும் அல்லது பிறர்குடியையும் கெடுக்கக்கூடியவர்களும், தான் எப்பொழுதும் உனக்கு துணையாக இருக்கின்றேன் என்று சொல்லி அவர்களிடம் இருக்கக்கூடிய பொருட்களை ஏதாவது ஒருவிதத்தில் பறித்து மோசம் செய்யக்கூடியவர்களும், நதிநீரில் சிறுநீர் கழித்து அசுத்தம் செய்யக்கூடியவர்களும், நிர்வாணமாக நீராடக்கூடியவர்களும் இறந்த பின்பு அவர்களுடைய உடலில் இருந்து ஆன்மா பிரிந்த பின்பு செய்த பாவங்களுடைய கணக்கின் அடிப்படையில் அந்த ஆன்மாக்களின் தலையில் ஆணிகள் அடிக்கப்படுகின்றன.

எப்பொழுதும் விலைமாதர்களின் வீடே கதி என்று இருக்கக்கூடியவர்களும், தன்னை நம்பி வந்த மனைவி மற்றும் தம்முடைய புதல்வர்களை சித்திரவதை செய்யக்கூடியவர்களும், ஒருவர் பேசிக்கொண்டு இருக்கும்பொழுது அதை அவருக்கு தெரியாமல் ஒட்டுக்கேட்டு அதை தவறான வழியில் பயன்படுத்தி குடும்பத்தில் சண்டையை உருவாக்கக்கூடியவர்களும், கணவனை இளக்காரம் செய்யக்கூடிய பெண்களும், நெல்லை உலர்த்தாமல் விற்பனை செய்தல் போன்ற தவறுகளை செய்தவர்களும் இறந்த பின்பு அவர்களுடைய உடலில் இருந்து ஆன்மா பிரிந்த பின்பு செய்த பாவங்களுடைய கணக்கின் அடிப்படையில் அந்த ஆன்மாக்களின் தலையில் ஆணிகள் அடிக்கப்படுகின்றன.

உடல் இல்லாத நிலையில் தலையில் ஆணி அடிக்கும் பொழுது எண்ணற்ற துன்பத்தை அவ்விடத்தில் பாவம் செய்த அந்த ஆத்மா அனுபவிக்கும். ஒருவேளை அவர்கள் தாகம் என்று கேட்கையில் கொதிக்கும் ஈயத்தை அவர்களின் வாயில் ஊற்றுவார்கள். இதனால் அந்த ஜீவாத்மா துன்பத்தை அனுபவிக்கும். அப்பொழுது பின்னால் இருக்கும் எமகிங்கரர்கள் கொடுமை செய்த அந்த ஆன்மாவை பிடரியில் குத்துவார்கள். மேலும் பாவம் செய்த கொடிய ஆன்மாக்களை 300 காதம் அகலம் இருக்கும் முள் காட்டில் போட்டு இழுத்து வதைத்து துன்புறுத்துவார்கள் எமகிங்கரர்கள்.